ގުޅިފަޅުން ދޫކުރާ ގޯތިތަކުގެ އިން ވަކިކުރަން ފަށައިފި
ގުޅިފަޅުން ދޫކުރާ ގޯތިތަކުގެ އިން ވަކިކުރަން ފަށައިފިއެވެ. މިއީ ބިންވެރިޔާ ސްކީމްގެދަށުން ދޫކުރި ގޯތި ތަކެވެ.
މިނިސްޓްރީ އޮފް ކޮންސްޓްރަކްޝަން, ހައުސިންގ އެންޑް އިންފްރާސްޓްރަކްޗަރ އިން މިއަދު ވިދާޅުވީ ގުޅިފަޅުން ދޫކުރާ ގޯތިތަކުގެ ބިންތައް ސާފުކޮށް، އިންވަކިކުރުމުގެ މަސައްކަތް މިއަދު ފަށާފައިވާ ކަމަށެވެ. އެމަސައްކަތް ކުރަމުންދާ ފޮޓޯތައްވެސް މިނިސްޓްރީން ވަނީ އާއްމުކޮށްފައެވެ.
އިން ވަކިކުރުމުގެ މަސައްކަތް މިނިސްޓްރީން ފަށާފައި މިވަނީ މިދިޔަ ސަރުކާރުގައި ހެދި ގުޅިފަޅުގެ ލޭންޑް ޔޫސް ޕްލޭނަށް ބަދަލު ގެނައުމަށްފަހުއެވެ. އަދި އެބަދަލާ ގުޅިގެން ގޯތީގެ ޕްލޮޓް ކަނޑައަޅަން އަލުން ގުރު ނެގުމަށްފަހު އެވެ.
އަލުން ގުރު ނެގުމަށްފަހު މިނިސްޓްރީން ވަނީ 1260 ފަރާތަކަށް ގޯތީގެ ރަޖިސްޓްރީ ހަވާލުކޮށްފައެވެ. އަލުން ގުރު ނަގާ އެއްބަސްވުންތައް ހަވާލުކުރަން ފެށީ ކުރީ ސަރުކާރުން ހެދި އެއްބަސްވުންތަކުގައި ބިމާބެހޭ ޤާނޫނާ ފުށުއަރާ ކަންތައްތަކެއްވެސް ހުރިކަން ފާހަގަކުރުމަށްފަހުއެވެ. ހުޅުމާލެ އާއި ގުޅިފަޅުން 9000 އަށްވުރެ ގިނަ ގޯތި ދޭން ވަނީ ނިންމާފައެވެ.
ރިއެކްޝަންސް
