ފުރަތަމަ ޓާމުގެ ކިޔެވުން ނިންމާ ދަރިވަރުން ޗުއްޓީއަށް
ރާއްޖޭގެ ސްކޫލުތަކުގެ ދަރިވަރުންނަށް މި އަހަރުގެ ދިރާސީ އަހަރުގެ ފުރަތަމަ ޓާމުގެ ކިޔެވުން ނިމި ރިޕޯޓް ފޯމް ދިނުމާއި އެކު މިއަދުން ފެށިގެން 16 ދުވަހުގެ ޗުއްޓީއެއް ލިބިއްޖެއެވެ.
ރާއްޖޭގެ އެކަޑަމިކް ކަލަންޑަރު ރޭވިފައިވާ ގޮތުން ދެން ދަރިވަރުން ސްކޫލަށް ދާންޖެހޭނީ މި އަންނަ އޮގަސްޓްމަހުގެ 10 ވަނަ ދުވަހުއެވެ. އަދި ކަލަންޑަރުގައިވާ ގޮތުން އަންނަ ސެޕްޓެމްބަރު މަހުގެ ތެރޭގައި މިޑްޓާމް ބުރޭކްގެ ގޮތުގައި 9 ދުވަހުގެ ޗުއްޓީއެއްވެސް ދަރިވަރުންނަށް ލިބޭނެއެވެ.
މި ސަރުކާރު ވެރިކަމަށް އައުމަށް ފަހު އެކަޑަމިކް ކަލަންޑަރަށް ގެނައި ބޮޑު ބަދަލާއި އެކު ސްކޫލު ތަކުގެ ބޮޑު ޗުއްޓީ ލިބިގެންދާނީ ޑިސެމްބަރު މަހުގެ ތެރޭގައެވެ. އެ ޗުއްޓީގައި ދަރިވަރުންނަށާއި ޓީޗަރުންނަށް ގާތްގަޑަކަށް ދޮޅުމަސް ދުވަސް ލިބޭނެއެވެ.
ތައުލީމީ ވުޒާރާއިން ނެރެފައިވާ ކަލަންޑަރުގައިވާ ގޮތުން އަންނަ އަހަރުގެ ދިރާސީ އަހަރުގެ ކިޔެވުން ފެށުމަށް ހަމަޖެހިފައި ވަނީ އަންނަ އަހަރުގެ ޖެނުއަރީ މަހުގެ އެންމެ ފަހު ހަފުތާގެ ތެރޭގައެވެ.
މިއަދު ދަރިވަރުން ޗުއްޓީއަށް ދާއިރު މި ޗުއްޓީ ދިމާވެގެން މިދަނީ ރާއްޖޭގެ މިނިވަންކަމަށް 60 އަހަރުފުރޭ އުފާވެރި ދުވަސްވަރާއި ވެސް ދިމާވާގޮތަށެވެ. މިއަންނަ ހޮނި ހިރު ދުވަހަކީ ދިވެހިރާއްޖޭގެ މިނިވަންކަމަށް 60 އަހަރުފުރޭ ފަޙްރުވެރި މިނިވަން ދުވަހެވެ.
ރިއެކްޝަންސް
