2007 ގެ ފަހުން އުފަންވާ ކުދިންނަށް ދުންފަތް މަނާވާ ބިލް ފާސްކޮށްފި
2007 ގެ ފަހުން އުފަންވާ ކުދިންނަށް ދުންފަތް މަނާވާ ބިލް ރައްޔިތުންގެ މަޖިލިހުން މިއަދު ފާސްކޮށްފި އެވެ. ބިލް މަޖިލިހުގެ ތަޅުމުން ފާސްކުރީ 63 މެމްބަރުންގެ ވޯޓުންނެވެ.
މިއީ ދުންފަތާ ދުރުކުރަން ސަރުކާރުން ކުރާ މަސައްކަތުގެ ތެރެއިން ޤާނޫނަށް ގެންނަ ބަދަލެކެވެ. ދުންފަތް ކޮންޓްރޯލްކުރުމާ ބެހޭ ޤާނޫނަށް ސަރުކާރުގެ ފަރާތުން ކިނބިދޫ ދާއިރާގެ މެމްބަރު އަލީ އަޝްރަގު ހުށަހެޅުއްވި ބިލް ދިރާސާ ކުރީ ވަގުތީ ކޮމިޓީއަކުންނެވެ. ނަމަވެސް ކޮމިޓީންވެސް ބިލަށް ބޮޑު ބަދަލެއް ނުގެނެއެވެ.
މިބިލް ތަސްދީގު ކުރެއްވުމުން 2007 ވަނަ އަހަރުގެ ޖެނުއަރީ މަހުގެ ފުރަތަމަ ދުވަހުގެ ފަހުން އުފަންވި, އުފަންވާ މީހުން ދުންފަތުގެ އިސްތިއުމާލު ކުރުން މަނާވާނެއެއެވެ. އަދި 21 އަހަރުން ދަށުގެ މީހުންނަށް ދުންފަތް ވިއްކުންވެސް މަނާވާނެއެވެ. ދުންފަތް ވިއްކަންވެސް ޚާއްސަ ވަކި ލައިސެންސެއް ބޭނުންވާނެއެވެ.
ބިލް މަޖިލުހުން ފާސްކުރި ނަމަވެސް އެމްޑީޕީގެ މެމްބަރުން ވަނީ ބިލް ޤާނޫނަކަށް ވީނަމަވެސް ތަންފީޒުކުރެވޭނެތޯ ސުވާލުއުފައްދާފައެވެ. ދުންފަތުގެ ބޭން ކަނޑައެޅުއްވުމަށް ރައީސުލްޖުމްހޫރިއްޔާ ޢާއްމުންގެ ލަފާވެސް ހޯދިއެވެ. ނަމަވެސް ބޭން މުއްދަތު ކަނޑައެޅުއްވީ ވަޒީރުންގެ މަޖިލިހުގެ މަޝްވަރާއަށްފަހުއެވެ.
ދުންފަތުގެ އިތުރުން ވޭޕާއި, ވޭޕާ ގުޅުންހުރި ބާވަތްތައް އެތެރެކުރުންވެސް ސަރުކާރުން ވަނީ މަނާކޮށްފައެވެ. އަދި ވޭޕް ބޭނުންކުރުންވެސް ވަނީ މަނާކޮށްފައެވެ.
ރިއެކްޝަންސް
