މަދީނާގެ ޙަރަމްފުޅުގެ އިމާމު ރާއްޖެއަށް ކުރެއްވި ތާރީޚީ ދަތުރުފުޅު ނިންމަވާލެއްވުމަށްފަހު ފުރާވަޑައިގެންފި
މަސްޖިދުއްނަބަވީގެ އިމާމު، ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެއަށް ކުރެއްވި ތާރީޚީ ދަތުރުފުޅު ނިންމަވައިލެއްވުމަށްފަހު މިއަދު ފުރާވަޑައިގެންފިއެވެ.
މި ދަތުރުފުޅުގައި ޝައިޚް ޞަލާޙް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދާ ބައްދަލުކުރައްވާފައެވެ. އަދި ރާއްޖޭގެ ޢިލްމުވެރިންނާއި، ޕްރީ ސްކޫލު ދަރިވަރުންނާއި، ޒުވާން ޙާފިޡުންނާއި ޚަޠީބުންނާ ވެސް ބައްދަލުކުރެއްވިއެވެ. މީގެ އިތުރުން ރާއްޖޭގެ އިސްލާމިކް ޔުނިވަސިޓީއަށް ވަޑައިގެން އެތަނުގެ އިސްވެރިންނާއިވެސް ބައްދަލުކުރައްވާފައި ވެއެވެ.
އެމަނިކުފާނުގެ ދަތުރުފުޅުގައި ސަލްމާން މިސްކިތާއި އިސްލާމީ މަރުކަޒުގައި އިމާމުވެ ނަމާދުކުރެއްވިއެވެ. އަދި އިސްލާމީ މަރުކަޒުގައި މުހިންމު ތަޤުރީރެއް ދެއްވުމުގެ އިތުރުން މިއަދުގެ ހުކުރު ނަމާދު އިމާމުވެވެ ވަޑައިގެން އިސްލާމީމަރުގައި ކުރައްވާފައި ވަނީ އެމަނިކުފާނެވެ.
ފަޟީލަތުއްޝައިޚް ޑރ. ޞަލާޙުލް ބުދައިރު ވެލާނާ އިންޓަނޭޝަނަލް އެއަރޕޯޓުން ފުރާވަޑައިގަތުމުގެ ކުރިން އަލްވަދާޢު ވިދާޅުވީ އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދެވެ.
މިއީ ވޭތުވެދިޔަ 40 އަހަރުގެ ތެރޭގައި ޙަރަމްފުޅުގެ އިމާމަކު ރާއްޖެއަށް ކުރެއްވި ފުރަތަމަ ދަތުރުފުޅެވެ.
ރިއެކްޝަންސް
