ރައީސުލްޖުމްހޫރިއްޔާ، ލިވަޕޫލްގެ އަކްސާ ޓްރެއިނިންގ ސެންޓަރަށް ޒިޔާރަތް ކުރައްވައިފި
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ލިވަޕޫލްގެ އަކްސާ ޓްރެއިނިންގ ސެންޓަރަށް ޒިޔާރަތް ކުރައްވައިފިއެވެ. އެމަނިކުފާނު އެސެންޓަރަށް ޒިޔާރަތްކުރެއްވީ ލިވަޕޫލްގެ ފުޓްބޯޅަ ކްލަބާއި ގުޅިގެން ރައްޖޭގެ ފަތުރުވެރިކަން އިޝްތިހާރުކުރުން ފެށުމަށް ބާއްވާ ޚާއްޞަ ހަރަކާތަށެވެ.
ރައީސުލްޖުމްހޫރިއްޔާ ވަނީ އަކްސާ ޓްރެއިނިންގ ސެންޓަރަށް ވަޑައިގެން ފުޓުބޯޅައިގެ ކޯޗިންގްގެ އަދި ތަމްރީނުތައް ބައްލަވާލައްވާފައެވެ.
ފަހުގެ ވަސީލަތްތަކާއެކު އެންމެ ޒަމާނީ ފެންވަރަށް ތަރައްޤީ ކޮށްފައިވާ ލިވަޕޫލްގެ އަކްސާ ޓްރެއިނިންގ ސެންޓަރަށް ކުރެއްވި ޒިޔާރަތުގައި ދިވެހިރާއްޖޭގެ ފުޓުބޯޅައިގެ ތަރައްޤީއަށް ކުރެވިދާނެ ކަންކަމާއި ކުރިއަރަމުންދާ އުންމީދީ ކުޅުންތެރީންނަށް ފުރުޞަތުތައް ފަހިކޮށްދެވޭނެ ގޮތްތައް ރައީސުލްޖުމްހޫރިއްޔާ އޮޅުންފިލުއްވިކަމަށް އެމަނިކުފާނުގެ އޮފީހުން ވިދާޅުވިއެވެ.
ރައީސުލްޖުމްހޫރިއްޔާ އިނގިރޭސި ވިލާތަށް ކުރައްވާ މި ޒިޔާރަތަކީ، އެޤައުމުގެ ލިވަޕޫލް ފުޓްބޯލް ކްލަބް (އެލް.އެފް.ސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސްއާ ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑިންގ ކެމްޕޭން ފެށުމުގެ ހަރަކާތުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. އެރަސްމިއްޔާތު އޮންނާނީ މިރޭ ލިވަޕޫލްގެ ދަނޑުގައި އެސްޓަންވިލާއާ ވާދަކުރާ މެޗުގެ ކުރިންނެވެ.
ރިއެކްޝަންސް
