ކެލައާއި ކާށިދޫ ފަޅުގައި ރިސޯރޓެއް ތަރައްޤީ ކުރަން ބީލަމަށް ހުޅުވާލައިފި
ކެލާ ފަޅުގައި 200 އެނދުގެ ދެ ރިސޯރޓް
ކ.ކާށިދޫ އާއި ހއ.ކެލާ ފަޅުތެރޭގައި ރިސޯރޓެއް ތަރައްޤީ ކުރުމަށް ބީލަމަށް ހުޅުވާލައިފިއެވެ. އެދެރަށުގެ ފަޅުތެރޭގައި ރިސޯރޓް ތަރައްޤީ ކުރުމަށް ވަކިވަކިން, ޓޫރިޒަމް އެންޑް އެންވަޔަރަމަންޓް މިނިސްޓްރީން ބީލަމަށް ހުޅުވާލީ އިއްޔެއެވެ.
ކެލާ ފަޅު ހިއްކައިގެން ދެ ރިސޯރޓް ތަރައްޤީ ކުރަން ވަނީ ހުޅުވާލާފައެވެ. އެއީ 156.2 ހެކްޓަރުގެ ސަރަހައްދެއްގައި ތަރައްޤީ ކުރާ ރިސޯރޓަކާއި, 169.3 ހެކްޓަރުގެ ސަރަހައްދެއްގައި ތަރައްޤީކުރާ ރިސޯރޓެކެވެ. މީގެތެރެއިން ކޮންމެ ރިސޯރޓެއް ހެދުމަށްވެސް 12.19 ހެކްޓަރު ހިއްކަން ޖެހެއެވެ.
ބީލަން ހުށަހެޅުމުގެ ކުރިން މައުލޫމާތު ދިނުން އޮތީ މިމަހުގެ 15 އަދި އަންނަ މަހުގެ 6 ވަނަ ދުވަހު ބާއްވާ ޒޫމް ބައްދަލުވުމެއްގައެވެ. ބީލަން ހުށަހަޅަން ޖެހެނީ ޖޫން 5 ވަނަ ދުވަހުގެ 13:00 ގެ ކުރިންނެވެ.
ކެލާ ފަޅުގައި ތަރައްޤީ ކުރާ ދެ ރިސޯރޓަކީވެސް 200 އެނދުގެ ދެ ރިސޯރޓެވެ.
ކާށިދޫ ފަޅުގައި ރިސޯރޓް ތަރައްޤީކުރަން ހުޅުވާލީ 115.21 ހެކްޓަރުގެ ސަރަހައްދެއްގައެވެ. މީގެތެރެއިން 10 ހެކްޓަރު ހިއްކަން ޖެހެއެވެ. ކާށިދޫގެ ބީލަން ހުށަހެޅުމަށްވެސް ދީފައިވަނީ ޖޫން 5 ވަނަ ދުވަހުގެ 13:00 ގެ ކުރިއެވެ. އަދި މައުލޫމާތު ދިނުން އޮތީ މިމަހުގެ 15 އާއި މެއި މަހުގެ 6 ވަނަ ދުވަހު ޒޫމް މީޓިންގ މެދުވެރިކޮށެވެ. ކާށިދޫ ފަޅުގައި ތަރައްޤީ ކުރަނީ 100 އެނދުގެ ރިސޯރޓެކެވެ.
ކެލައާއި ކާށިދޫ ފަޅުގައި ރިސޯރޓް ތަރައްޤީ ކުރުމަކީ ރައީސް ޑރ.މުޙައްމަދު މުއިއްޒުގެ ވައުދެކެވެ.
ރިއެކްޝަންސް
