ޕޮލިސް ބޯޑަށް ދެބޭފުޅަކު އައްޔަންކުރަން މަޖިލީހުން ރުހުންދީފި

އާންމުންގެ ތެރެއިން ޕޮލިސް ބޯޑަށް އައްޔަންކުރާ ދެ މެންބަރުންގެ ގޮތުގައި މުޙައްމަދު ޞާދިގު އާއި އަޙްމަދު މިޒްމާދު އައްޔަންކުރެއްވުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.

މި ދެބޭފުޅުން އައްޔަންކުރުމަށް ފާސްކޮށްފައި ވަނީ މިއަދު ބޭއްވި މަޖިލީހުގެ ޖަލްސާގައި  ނެގި ވޯޓުގައި ބައިވެރިވެ ވަޑައިގެންނެވި 64 މެންބަރުންގެ އިންތިފާގުންނެވެ.

މި ދެބޭފުޅުންނަކީ ޕޮލިސް ބޯޑަށް އާންމުންގެތެރެއިން އައްޔަންކުރާ މެންބަރުކަމަށް ހުޅުވާލުމުން ކުރިމަތިލެއްވި 4 ބޭފުޅުންގެ ތެރެއިން މަޖިލިހުގެ ސަލާމަތީ ޚިދުމަތްތަކާބެހޭ ކޮމިޓީން މައްސަލަ ދިރާސާކޮށް ނިންމުމަށްފަހު ތަޅުމަށް ފޮނުވުމަށް ފާސްކުރެއްވި ދެ ބޭފުޅުންކަމަށް މަޖިލިހުން ވިދާޅުވިއެވެ. 

ދިވެހި ފުލުހުންގެ ޚިދުމަތުގެ ޤާނޫނުގެ ދަށުން، ޕޮލިސް ބޯޑަށް އާންމުންގެ ތެރެއިން ދެ މެންބަރުން އައްޔަންކުރަން ޖެހެއެވެ. މި މަޤާމުތަކަށް އައްޔަންކުރެވޭ މެންބަރުންގެ ދައުރަކީ ހަތަރު އަހަރު ދުވަހެވެ.

ޕޮލިސް ބޯޑަކީ 7 މެންބަރުންގެ މައްޗަށް އެކުލެވޭ ބޯޑެކެވެ. މީގެ ތެރޭގައި ރައީސުލްޖުމްހޫރިއްޔާ އައްޔަންކުރައްވާ ދެ މެންބަރުންނާއި، ފަންނީ ދާއިރާތަކުން ތިން މެންބަރުން އަދި އާންމުންގެ ތެރެއިން ދެ މެންބަރުން ހިމެނެއެވެ.