ރަސްމާދޫ އަށްވެސް ހައުސިންގ ޔުނިޓް މަޝްރޫއެއް
ގެދޮރުވެރިކަމުގެ މަޝްރޫޢުތަކުގެ ތެރެއިން އިސްކަން ދެއްވައިގެން، ރ.ރަސްމާދޫގައި ވެސް ހައުސިންގ ޔުނިޓް މަޝްރޫޢެއް ހިންގަވައިދެއްވާނޭކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، މާޅޮސްމަޑުލު އުތުރުބުރީގެ ބައެއް ރަށްތަކަށް މިހާރު ކުރައްވަމުންގެންދަވާ ޒިޔާރަތުގެ ތެރެއިން، ރަސްމާދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މި އަހަރަށް ކަނޑައެޅުއްވި ބަޖެޓުގައި އިސްކަންދޭ ތަރުތީބުގައި އެއްވަނައިގައި ބޯހިޔާވަހިކަން ހިމެނުއްވުމުގެ ޙިކުމަތް ހާމަކުރައްވަމުން ރައީސުލްޖުމްހޫރިއްޔާ ވިދާޅުވީ، ގެދޮރުގެ ދަތިކަމާއި ތޮއްޖެހުމަކީ، އިޖުތިމާޢީ މައްސަލަތަކުގެވެސް މައިގަނޑު ސަބަބުކަމަށެވެ. އެހެންކަމުން، ރަސްމާދޫއަށްވެސް ދިމާވެފައިވާ މި މައްސަލައަށް ޙައްލެއް ހޯދުމުގެ ގޮތުން، ހައުސިން ޔުނިޓު މަޝްރޫޢެއް ކުރިއަށް ގެންގޮސްދެއްވާނޭކަމަށް އެމަނިކުފާނު ވިދާޅުވިއެވެ.
" އިރާދަކުރެއްވިއްޔާ އަޅުގަނޑުމެން ކުރިއަށްގެންދާ ގެދޮރުވެރިކަމުގެ މަޝްރޫޢުތަކުގެ ތެރެއިން، މި ރަށުގައި އަޅުގަނޑުމެން ހައުސިންގ ޔުނިޓް މަޝްރޫޢެއް، އިސްކަމެއް ދީގެން ކުރިއަށް ގެންގޮސްދޭނެކަން ތިޔަބޭފުޅުންނަށް ވަރަށް ސާފުކޮށް ޔަޤީންކަމާއެކު ދަންނަވާލަން."
މީގެއިތުރުން ރަސްމާދޫގައި ހުއްޓިފައިވާ ފެނުގެ ނިޒާމުގެ މައްސަލައަށް އިޝާރާތްކުރައްވައި އެމަނިކުފާނު ވިދާޅުވީ، އެ މަސައްކަތް ހަވާލުކުރި ފަރާތުން ރަސްމާދޫ ނޫން ރަށްރަށުގައިވެސް މަސައްކަތް ހުރީ ހުއްޓާލާފައިކަމަށެވެ. ނަމަވެސް އަލުން އެ މަސައްކަތްތައް ފަށައި، މަސައްކަތް އެއްކޮށް ނިންމަވައިދެއްވާނޭކަމުގެ ޔަގީންކަން ރައީސް ދެއްވިއެވެ,.
ސްކޫލްގެ މަސައްކަތްވެސް، ގޮސްފައިވާ ހިސާބު ދެނެގަނެ، ދެން ނިންމަން ހުރި މަސައްކަތްތައް، ސަރުކާރުން ކުރައްވާނޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އަދި ކުޅިވަރާއި ހަށިހެޔޮކަމުގެ ދާއިރާއިންވެސް ބޭނުންވާ ކަންކަން ފުރިހަމަކޮށްދެއްވައި، ލެބޯޓްރީއެއް ހިމެނޭ ގޮތަށް ރަށު ސިއްޙީ މަރުކަޒުގެ ޖާގަ އިތުރުކޮށްދެއްވާނޭ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
ރަސްމާދޫ އަކީ، އެރަށުގައި ފުލުހުން ޤާއިމުވެ ތިބޭ، އަދި ފުލުހުންގެ ޚިދުމަތްދޭ ރަށަކަށް، ވީހާވެސް އަވަހަށް ހެއްދެވުމަށް ނިންމަވާފައިވާކަމަށްވެސް އެމަނިކުފާނު ވިދާޅުވިއެވެ. އަދި ރަސްމާދޫ އެންޓަނާ މިހާރު ހުރި ތަނުން ބަދަލުކުރުމާއި، އެކަމުގައި ދޭންޖެހޭ ފައިސާއާ ގުޅޭގޮތުން، އުރީދޫއާ ވާހަކަދައްކައިގެން، ކަމާބެހޭ ވުޒާރާތަކުގެ ތެރެއިން ޙައްލު ހޯއްދަވައިދެއްވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ.
ރިއެކްޝަންސް
