ރެއާލް އަށް ހޭނުމުގެ ދަތުރު އުނދަގޫ, އެކަމަކު ދެން އަހަރެން ނުހުއްޓުވޭނެ: އެމްބާޕޭ
ރެއާލް މެޑްރިޑަށް ހޭނުމުގެ ދަތުރުގައި ވަރަށް 'ސްޓްރަގަލް' ކުރި ކަމަށާއި އެއަށްވުރެ އުނދަގޫ ދުވަސްތަކެއް ވަކި ނާންނާނެ ކަމަށް މިސީޒަނުގައި ރެއާލްއާ ގުޅުނު ކީލިއަން އެމްބާޕޭ ބުނެފިއެވެ. ނަމަވެސް އޭނާ ބުނީ މިހާރު ރެއާލްގެ ފެނަށް ދިރިއްޖެ ކަމަށާއި މިހާރު ހުރީ އެންމެ ރަނގަޅު ފޯމުގައި ކަމަށެވެ.
ރެއާލްއަށް ބަދަލުވީފަހުން ހުރިހާ މުބާރާތްތަކެއްގައި މިހާތަނަށް އޭނާ ވަނީ ރެއާލަށް 18 ގޯލް ކާމިޔާބުކޮށްދީފައެވެ. އޭގެ ތެރޭގައި އެންމެ ފަހުން ކުޅުނު ތިން މެޗުގައި ޖެހި ހަތުރު ގޯލްވެސް ހިމެނެއެވެ. މީގެ ދެތިން ހަފުތާކުރިން ފޯމަކަށް އެޅެންފެށި އެމްބާޕޭ މިހާރު ހުރީ އޭނާގެ އެންމެ ރަނގަޅު ފޯމާއި ދާދި ކައިރީގައެވެ.
ނަމަވެސް ސީޒަންގެ ކުރީކޮޅު ގޯސްތަކެއް ހެދި މުހިއްމު ދެ ޕެނަލްޓީއެއްވެސް އޭނާ އަތުން މިސްވިއެވެ. ލަލީގާ ގައި އެތްލެޓިކޯ އާ ދެކޮޅަށް އަދި ޗެމްޕިއަންސް ލީގުގައި ލިވަޕޫލާ ދެކޮޅަށް ކާމިޔާބުކުރަން ޖެހުނު ދެ ޕެނަލްޓީވެސް ނާކާމިޔާބު ވީ އެމްބާޕޭ އަތުންނެވެ.
"އަހަރެން ވަރަށް ވިސްނިން. ހޭނެމުން އައިއިރު ކުރިއަށް ދިއުމާ ބެހޭގޮތުން އަހަރެން ވަރަށް ވިސްނިން. ކްލަބުން މަޤާމެއް ހާސިލްކުރުމާމެދު. އެއީ ވިނީޝިއުސް ނޫނީ ރޮޑްރީގޯގެ ޒޯނަށް އަރައިގެން ވިއަސް. އެހާވަރަށް ވިސްނީމަ ކުޅުމަށް ސަމާލުކަމެއްވެސް ނުދެވުނު އޭރު" ޗެމްޕިއަންސް ލީގުގައި އާރުބީ ސަލްސްބާގްއާ ދެކޮޅަށް ނިކުތުމުގެ ކުރިން ބޭއްވި ނޫސް ކޮންފަރެންސެއްގައި އެމްބާޕޭ ބުންޏެވެ.
އޭނާ އިތުރަށް ބުނީ ކްލަބަށް ހޭނެން އެހާ ވަގުތު ނަގާނެކަން އޭނާ ކުރިން އުއްމިދު ނުކުރާ ކަމުގައެވެ. އެކަމަކު އެއީ ނަފްސާނީ ގޮތުން ބަލިކަށިވި ދުވަސްކޮޅެއް ކަމަށެވެ. "ފިޒިކަލީ އަހަރެން ފިޓް. ޓީމާއެކު ވަރަށް އުފަލުން ހުރީ. އެކަމު އަހަންނަށް އެނގޭ އަހަރެންގެ މެކްސިމް އޭރު ނުދެވޭކަން. އެހަރެންގެ އަމިއްލަ ނަފްސަށް އަހަރެން ބުނަން މެޑްރިޑަށް ތި އައީ ތިހާ ދަށް ކުޅުމެއް ކުޅޭކަށް ނޫނޭ" އެދުވަސްތަކާ ގުޅޭގޮތުން ފުރަތަމަ ފަހަރަށް މީޑިއާ ވާހަކަދައްކަމުން އެމްބާޕޭ ބުންޏެވެ.
އޭނާބުނީ އޭނާގެ ކިބައިން ރަނގަޅު ކުޅުމެއް ދެކެން މީހުން ތަންކޮޅެއް ބޮޑަށް އުއްމީދުކުރާނެކަން އެނގޭ ކަމަށާއި, އެކަން އޭނާ ޒާތީކޮށް ނުނަގާ ކަމަށެވެ. އަދި ހާލަތު ބަދަލުވާނެ ކަމުގެ ޔަޤީންކަށް އޭނާއަށް އޭރުވެސް އޮތް ކަމަށެވެ. މިހާރު އޭނާގެ އަމިއްލަ ނަފްސަށް އިތުބާރު ލިބިއްޖެ ކަމަށާއި ދެން އޭނާ ނުހުއްޓުވޭނެ ކަމުގައިވެސް އެމްބާޕޭ ބުންޏެވެ.
ރިއެކްޝަންސް
