ޞައްހަނޫން ފޯމެއް ހުށަހަޅައިގެން ޕީއެންސީއަށް ވައްދާފައިވާނަމަ އެޕާޓީއަށް އަންގައިދިނުމަށް އެދިއްޖެ

ޞައްހަނޫން ފޯމެއް ހުށަހަޅައިގެން ޕީއެންސީއަށް ވައްދާފައިވާނަމަ އެކަން އެޕާޓީއަށް އަންގައިދިނުމަށް އެދިއްޖެއެވެ. ޞައްހަނޫން ފޯމްތަކެއް ހުށަހަޅައިގެން ޕީއެންސީއަށް ބައެއް މެމްބަރުން ވައްދާފައިވާ މައްސަލަތަކެއް ފެންމަތިވެފައި ވަނިކޮށް ޕީއެންސީން މިއަދު ނެރުނު ބަޔާނެއްގައި ބުނީ ޞައްހަނޫން ފޯމްތަކެއްގެ މުޤާބިލްގައި އެޕާޓީއަށް މެމްބަރުން އިތުރުކޮށް, ދިވެހި ރައްޔިތުންގެ ހައްޤުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ އެޕާޓީގެ ރައީސް އަދި ލީޑަރޝިޕުން ބަލައިގަންނަ އަދި ހިތްވަރުދޭނެ ކަމެއް ނޫން ކަމަށެވެ.

އެފަދަ ގޮތަކަށް ޕީއެންސީއަށް ވައްދުމުގެ އެއްވެސް މައްސަލައެއް ކުރިމަތިވެފައިވާނަމަ އެޕާޓީގެ އީމެއިލް info@pnc.v  އަށް މެއިލް ކުރުމަށް ވަނީ އެދިފައެވެ. އީމެއިލްކުރުމުން އެފަދަ ކަންކަމަށް އަވަސް ހައްލެއް ގެނެސްދިނުމަށް ކުރެވެންހުރި ހުރިހާ ކަމެއް ކޮށްދޭނެ ކަމުގެ ޔަގީންކަން ޕީއެންސީން ވަނީ ދީފައެވެ.

ޕީއެންސީގެ ބަޔާނުގައި ބުނީ އެޕާޓީގެ މެމްބަރޝިޕް އިތުރުކުރުމަށް މުޅިރާއްޖެއަށް ހުޅުވާލައިގެން, ޕާޓީގެ އެކްޓިވިސްޓުންނާއި ހެޔޮއެދޭ ފަރާތްތަކުގެ ބައިވެރިވުމާއެކު ހިންގި 'މެމްބަރޝިޕް ޑްރައިވް' ގައި އިލެކްޝާން ކޮމިޝަނަށް ހުށަހެޅި އެތައްހާސް ފޯމެއްގެ ތެރެއިން ޞައްޙަ ނޫން ފޯމްތަކެއް މަދުން ނަމަވެސް ހުށަހެޅިފައިވާކަން ފާހަގަކުރެވިފައިވާ ކަމަށެވެ. ޕީއެންސީގެ މެމްބަރޝިޕް ޑްރައިވް އަކީ މިހާތަނަށް އެއްފަހަރާ އެންމެގިނަ އަދަދަކަށް ސިޔާސީ ޕާޓީއަކަށް މެމްބަރުން ވަނުމަށް ފޯމް ހުށަހެޅުން ހަރަކާތްކަން ޕީއެންސީގެ ބަޔާނުގައި ފާހަގަކޮށްފައި ވެއެވެ.

ޕާޓީއަށް ލިބޭ ފޯމްތަކުގެ ޞައްޙަކަން ކަށަވަރުކުރުމުގެ ޤާބިލްކަން ޕާޓީގައި ނެތުމުގެ ނަތީޖާއަކީ ފޯމެއްގެ ޞައްހަކަމާމެދު ސުވާލު އުފެދޭ ހިސާބަކީ އިލެކްޝަނަށް ފޯމް ހުށަހެޅުމުގެ ފަހު މަރުހަލާ ކަމުގައިވުން ކަމަށް ޕީއެންސީގެ ބަޔާނުގައި ބުނެފައިވެއެވެ. އަދި ފޯމްތަކުގެ ޞައްހަކަން ކަށަވަރުކުރުމުގެ ޤާބިލްކަން ނެތުމަކީ ހަމައެކަނި ޕީއެންސީއަށް އޮތް ގޮންޖެހުމެއް ނޫންކަންވެސް ބަޔާނުގައި ފާހަގަކޮށްފައި ވެއެވެ.

ޕީއެންސީން ބުނީ ޞައްޙަނޫން ފޯމްތަކެއް އެޕާޓީގެ ނަމުގައި ހުށަހަޅާފައިވާތީ ފުލުހުންނަށާއި އިލެކްޝަން ކޮމިޝަނަށް ހުށަހަޅާފައިވާ ޝަކުވާތަކެއް ބަލަމުންދާކަން އެޕާޓިއަށް އެދުމުއައްސަސާއިންވެސް އަންގާފައިވާ ކަމަށެވެ. އަދި އެކަން ބެލުމުގައި ދޭންޖެހޭ އެއްބާރުލުން ދޭނެ ކަމުގެ ޔަގީންކަން ޕީއެންސީން ވަނީ ދީފައެވެ.