އެކްޓިވިސްޓް ދޮންކޮޅުގެ ފޯމާ ހަވާލުވެވަޑައިގެން, ރައީސްގެ މަރުހަބާ!

އިދިކޮޅު އެމްޑީޕީގެ އެކްޓިވިސްޓް އަހުމަދު ރަޝީދު (ދޮންކޮޅު) ވެރިކަންކުރާ ޕީއެންސީއާ ގުޅުމުން, މެމްބަރޝިފް ފޯމާ ހަވާލުވެވަޑައިގެން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު މަރުހަބާ ދަންނަވައިފިއެވެ.

ޕީއެންސީގެވެސް ރައީސް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ދޮންކޮޅުގެ ފޯމާ ހަވާލުވެވަޑައިގަތުމަށްފަހު ކުރެއްވި ޓްވީޓްގައި ވިދާޅުވީ ދޮންކޮޅުގެ މެމްބަރޝިޕް ފޯމާ ހަވާލުވުމުގެ އުފާ ލިބިވަޑައިގެން, ޕީއެންސީއަށް މަރުހަބާ ދަންނަވާ ކަމަށެވެ. ދޮންކޮޅު ޕީއެންސީއަށް ސޮއިކިރުމުގެ ރަސްމިއްޔާތުގައި ރައްޔިތުންގެ މަޖިލިހުގެ ރައީސް އަދި ޕީއެންސީގެ ޗެއަރޕަސަން އަބްދުއްރަހީމް އަބްދުالله އާއި ޕީއެންސީގެ ޕީޖީ ލީޑަރު އިބްރާހީމް ފަލާހު އާއި, ތިނަދޫ ދެކުނު ދާއިރާގެ މެމްބަރު ސައުދުالله ހިލްމީ ބައިވެރިވެވަޑައިގެންނެވިއެވެ.

https://x.com/MMuizzu/status/1878454800607797258

ކުއްލި ގޮތަކަށް ދޮންކޮޅު ޕީއެންސީއަށް ސޮއިކުރީ އެމްޑީޕީ ދޫކޮށް, ދަ ޑިމޮކްރެޓްސް އުފައްދައިގެން ވަޑައިގެންނެވި އެޕާޓީގެ ކުރީގެ ލީޑަރުން އެނބުރި އެމްޑީޕީއަށް ސޮއިކުރައްވާފައި ވަނިކޮށެވެ. ޑިމޮކްރެޓްސް އަށް ވަޑައިގެންނެވި ބޭފުޅުން އަލުން އެމްޑީޕީން ބަލައިގެންފިނަމަ ޕާޓީ ދޫކޮށްލާނެ ކަމަށް ދޮންކޮޅު އައީ އަބަދުވެސް ބުނަމުންނެވެ. އެއީ އޭނާވެސް ހިމެނޭ ގޮތަށް އެމްޑީޕީ މަގުމަތިވީ ޑިމޮކްރެޓްސްގެ ސަބަބުން ކަމަށް ގަބޫލުކޮށް, އެކަން ގެންދިޔައީ ފާހަގަކުރަމުންނެވެ.

ދޮންކޮޅު ޕީއެންސީއަށް ސޮއިކުރުމުން އެޕާޓީގެ ލީޑަރޝިޕްގެ ބޭފުޅުންވެސް ގެންދަވަނީ މަރުހަބާ ކިޔަމުންނެވެ.