ހަސީނާގެ މައްޗަށް ދަޢުވާކޮށްދިނުމަށް އެދި އެތައްހާސް ބަޔަކު ބަނގްލަދޭޝްގައި މުޒާހަރާ ކުރަނީ
ބަނގްލަދޭޝްގެ ވެރިރަށް ޑާކާގެ މަގުތަކަށް އެތައްހާސް ބަޔަކު އެއްވެ, ކުރީގެ ބޮޑުވަޒީރު ޝެއިޚް ހަސީނާގެ މައްޗަށް ޖިނާއީ ދަޢުވާ ކޮށްދިނުމަށް ގޮވާލާއިފިއެވެ. މުޒާހަރާގެ ބައިވެރިން ބުނާގޮތުން ފާއިތުވި ޖުލައި މަހު ހަސީނާގެ ސަރުކާރާ ދެކޮޅަށް މުޒާހަރާ ކުރި އެތައްބަޔަކު މުޒާހަރާގެ ތެރެއިން މަރާލާފައިވާތީ, އެކަމާ ހަސީނާ އަދި އޭނާގެ ސަރުކާރުގެ ވެރިން ޒިންމާވާން ޖެހޭނެއެވެ.
އަންގާރަ ދުވަހު 'އެއްބައިވަންތަކަމުގެ ހިނގާލުމުގެ' ނަމުގައި އެންޓައި-ޑިސްކްރިމިނޭޝަން މޫވްމަންޓް އިން އިންތިޒާމްކޮށްގެން ބޭއްވި މި އެއްވުން އޮތީ ސެންޓްރަލް ޝަހީދު މިނާރުގައެވެ. އެއީ ވެރިރަށް ޑާކާގައި ހުންނަ ޤައުމީ މޮނިއުމަންޓްއެކެވެ.
މި އެއްވުމުގައި ބައިވެރިވި އެތައްހާސް ބައިވެރިން ވަނީ ހަސީނާގެ މައްޗަށް ޖިނާއި ތަޙްޤީގް ހިންގުން އަވަސްކުރުމަށާއި, އEނާގެ ސިޔާސީ ޕާޓީ, އަވާމީ ލީގު މަނާކުރުމަށް ގޮވާލާ އަޑު އުފުލާފައެވެ.
ވެރިކަން ވެއްޓުމަށްފަހު ހަސީނާ ވަނީ ފިލައިގެން އިންޑިއާ އަށް ގޮސް އެގައުމުން ސިޔާސީ ހިމާޔަތް ހޯދާފައެވެ. ހަސީނާގެ ވެރިކަން ވެއްޓުނީ ބަނގްލަދޭޝްގެ ކިޔަވާކުދިންގެ ޖަމްއިއްޔާތަކުން ފެށި މުޒާހަރާތައް ހޫނުވެ, މުޒާހަރާތައް ފެށިތާ ފަސް ހަފުތާ ފަހުންނެވެ. މުޒާހަރާތަކުގައި އެތައްސަތޭކަ ބަޔަކު މަރުވެ, އެތައްހާސް ބަޔަކު ޒަޚަމްވިއެވެ. ނަމަވެސް މުޒާހަރާގެ ބައިވެރިން ސަރުކާރަށް ދޫދިނުމެއްނެތި ހަސީނާގެ 15 އަހަރުވީ ދިގު ވެރިކަން ވަނީ ނިމުމަކަށް ގެނުވާފައެވެ. ހަސީނާ, އޭނާގެ ވެރިކަމުގެ ހަތަރުވަނަ ދައުރު ފެށީ 2024 ޖެނުއަރީގައެވެ.
ފާއިތުވި ހަފުތާގައި ބަނގްލަޝްއިން ވަނީ ހަސިނާ އެނބުރި ޤައުމަށް ފޮނުވައިދިނުމަށް އެދި ރަސްމީ ގޮތުން އިންޑިއާއަށް ހުށަހަޅާފައެވެ. މުޒާހަރާގައި މަރުވި ގިނަ ބައެއްގެ މަރާއެކު އޭނާގެ މައްޗަށް ގިނަ ތަޙްޤީގް ތަކެއް ހިންގޭނެއެވެ. އޭގެތެރޭގައި އިންސާނިއްޔަތާ ޚިލާފް އަނިޔާ ދިނުމުވެ ކުށްވެސް ހިމެނެއެވެ.
ރިއެކްޝަންސް
