އިޒްރާއިލްއިން ޣައްޒާއަށް އެހީގެ ދޮރުތައް ބަންދުކޮށްފައި, ބޯ ވިއްސާރަ އާއެކު ޓެންޓްތަކުގެ ދިރިއުޅުން އިތުރު ތަކްލީފަކަށް!
އާ އަހަރެއް ފެށުނުއިރު ޣައްޒާގެ ހާލަތު ގޯހުން ގޯހަށް
ޣައްޒާއަށް އެހީގެ ތަކެތި ލިބެން އޮތް އެންމެހާ މަގުތައް ނިޒާމީ ގޮތެއްގައި އިޒްރާއިލްއިން ބަންދުކޮށްފައި ވާކަމަށް އދ ން ބުނެފިއެވެ. ޣައްޒާގެ އިދާރާތަކުން މައުލޫމާތު ދޭ ގޮތުގައި ޣައްޒާގެ ރައްޔިތުން ވަނީ 14 މަސްދުވަހުގެ ތެރޭގައި 7 ފަހަރަށް އެމީހުން ދިރިއުޅުން އެއްތަނުން އަނެއް ތަނަށް ބަދަލުކުރަން މަޖުބޫރު ވެފައެވެ.
ހަނގުރާމަ އާއެކު ޣައްޒާގެ މުޅި އާބާދީގެ 4.2 މިލިއަން މީހުން ވަނީ ވިއްސިވިހާލި ވެފައެވެ. އެންމެ ގިނަ ބަޔަކު ތޮތްޖެހިފައިވަނީ މެދުތެރޭ ޣައްޒާގެ ހިސާބުތަކުގެ އައްސޭރި ފަށުގައެވެ. ވީދިފައިވައިވާ ޓެންޓުތަކުގައި ގިނަ ބަޔަކު ދިރިއުޅެމުން ދާއިރު ޣައްޒާއަށް މިވަނީ ހަނގުރާމައިގެ ތެރޭގައި ދެވަނަ ފިނިމޫސުމާ ކުރިމަތިލާންޖެހިފައެވެ. އައްސޭރިފަށަށް އިންތިހާއަށް ވައިގަދައިރު, އަންގާރަ ދުވަހު ވެހުނު ދިއްސާރައިގައި ޓެންޓްތަކުގައި ވަނީ ފެންބޮޑުވެފައެވެ. އަދި ޓެންޓްތައް ހިމެނޭ ސަރަޙައްދުގައި ދިރިއުޅޭ މީހުންގެ ދިރިއުޅުން ވަނީ އިތުރު ތަކްލީފަކަށް ވެފައެވެ.
ގަދަ ފިނީގައި ތުއްތުކުދިން ހައިޕޮތަމިއާގައި (ހަށިގަނޑުގެ ހޫނުމިން އެކަށީގެންވާ ވަރަށްވުރެ ދަށްވުން) ކުޑަކުދިން ގަނޑުވެގެން ވަނީ މަރުވާން ފަށާފައެވެ. ހަފުތާއެއްގެ ތެރޭގައި ގަދަ ފިނީގައި ގަނޑުވެގެން އެއްމަހަށްވުގެ ހަގު 7 ކުދިން ނިޔާވެފައިވާ ކަމަށް އދ ގެ ކުޑަކުދިންގެ ހައްގުތަކާ ބެހޭ ފަންޑް (ޔުނިސެފް) ވަނީ މަޢުލޫމާތު ދީފައެވެ.
ހޯމަ ދުވަހު ވިހި ދުވަހުގެ އެއްމާބަނޑު ދެކުދިންގެ ތެރެއިން އެއްކުއްޖަކު ގަނޑުވެގެން މަރުވެފައިވާއިރު, އަންގާރަ ދުވަހު އަނެއް ކުއްޖާ, (ޢަލީ) ވަނީ މިދުނިޔެ ދޫކޮށްފައެވެ. ޣައްޒާގެ ފިނިމިން އިންތިހާއަށް ހުރިއިރު އެކަށީގެންވާ ބޯހިޔާވަހިކަމާއި ފިނިން ރައްކާތެރިވާނެ ތަކެތި ނެތި, ޙާލަތަށް ބަދަލެއް ނާންނަނަމަ ތުއްތުކުދިންތަކެއް ދުނިޔެ ދޫކުރުމަކީ އެކަށީގެންވާކަމެއް ކަމުގައި ދުނިޔޭގެ ސިއްޙަތު ޖަމްޢިއްޔާއިން ވަނީ ބުނެފައެވެ.
ޣައްޒާއަށް އެހީގެ ތަކެތި އެތެރެވުމަށްހުރި އެންމެހާ ދޮރުތައް އިޒްރާއިލްއިން ވަނީ ބަންދުކޮށްފައެވެ. ޔުނިސެފުން މަޢުލޫމާތު ދިން ގޮތުގައި ގަދަ ފިނީގައި އެތައްހާސް ކުޑަކުދިންނަށް ފިނިހެދުމާއި ރަޖާ ބޭނުންވެއެވެ. އެކަމަކު ބޭނުންވާ އަދަދާ ގާތަށްވެސް އެފަދަތަކެތި ފޯރުކޮށްދެވޭގޮތް ވަނީ ނުވެފައެވެ.
ރަޖާ, ގޮދަޑި އަދި ފިނިހެދުން ހިމެނޭ އެތައް ޓްރަކެއް ޣައްޒާގެ ބޯޑަރުކައިރީ އިޒްރާއިލްގެ ހުއްދަ ނުލިބިގެން އެތެރެ ނުވެވިފައި މިހާރުވެސް އެބަތިއްބެވެ.
ރިއެކްޝަންސް
