2024ގެ ދުނިޔޭގެ ރެކޯޑުފޮތުން ޖާގަހޯދަން ބެލްޖިއަމްގެ އަންހެނަކު ކޮންމެ ދުވަހަކު މެރަތަން އެއް ދުވެފި

2024 ވަނަ އަހަރު ނިމެން ކުޑަތަންވެފައިވާއިރު ދުނިޔޭގެ ރެކޯޑު ފޮތުން ޖާގައެއް ހޯދުމަށް އަޒުމްކަނޑައެޅި ހިލްޑޭ ޑޮސޯން އަހަރުގެ ކޮންމެ ދުވަހަކު މެރެތަން އެއް ދުވެފިއެވެ. ބެލްޖިއަމްގެ މި އަންހެން މީހާ ވަނީ އަހަރު ދުވަހުގެ ތެރޭގައި 15,444 ކިލޯމީޓަރަށް ދުވެފައެވެ.
ފަހު މެރަތަން ނިންމާލިއިރު 55 އަހަރުގެ ޑޮސޯން އަށް ކޮންމެވެސް ވަރަކަށް ވަރުބަލިވެފައި ހުރި ނަމަވެސް ހަކަތަ ހުސްވާން ގާތްވެސް ނުވެއެވެ. ފަހު މެރެތަން ނިންމާލުމާއެކު އޭނާއާއެކު ދުވުނު ބައިވެރިންވަނީ ޑޮސޯންއަށް ހޫނު މަރުޙަބާއެއް ކިޔާފައެވެ.
"އަހަރެން ވަރަށް އުފާކުރަން މިކަން ނިމުނީމަ" އަންގާރަ ދުވަހު މެރަތަން ނިންމާ ލައިން ކައިރީގައި ހުރެ މީޑިއާތަކަށް އޭނާ ބުންޏެވެ. އެއް އަހަރު ތެރޭގައި ކޮންމެ ދުވަހަކު މެރަތަން އެއް ދުވިއިރު އޭނާ ވަނީ އުރަމަތީގެ ކެންސަރުގެ ރިސާޗް ފަންޑަށް 60,000 ޔޫރޯ (62,438 އެމެރިކާ ޑޮލަރު) ހޯދާފައެވެ.
ރެކޯޑް ފޮތަށް އެރުވުމަށްޓަކައި މިހާރު ދަނީ ޑޮސޯންގެ ޖީއެސްޕީ ޑޭޓާ, ފޮޓޯ އަދި ވީޑިއޯ ހެކީގެ ގޮތުގައި ހޯދުމުގެ މަސައްކަތްކުރަމުންނެވެ. އޭގެ ތެރޭގައި ވަކި އަތަކަށް ނުޖެހޭ ރިޕޯޓަރުންންގެ ހެކިބަސްވެސް ހިމެނޭނެއެވެ. އެއީ ގިނިސް ބުކްސް އޮފް ވޯލްޑް ރިކޯޑްސް އަށް ފޮނުވުމަށްޓަކައި އެއްކުރަންޖެހޭ މަޢުލޫމާތެވެ. ރެކޯޑް ބަލަހައްޓާ ފަރާތުން އެތަކެތި ޤަބޫލުކޮށްފިނަމަ ކުރިއަށް އޮތް ތިން މަސްދުވަހުގެ ތެރޭގައި  އެއް އަހަރެއްގެ ތެރޭގައި ކޮންމެ ދުވަހަކު މެރަތަން އެއް ދުވި ފުރަތަމަ އަންހެނާގެ ލަގަބު ޑޮސޯން އަށް ލޮބޭނެއެވެ.