ޒަކިއްޔާ މަރާލި ކަމުގެ ހެއްކެއް ނެތް, ހޮޅުދޫ ރައްޔިތުން ގަބޫލެއް ނުކުރޭ!
ސެޕްޓެމްބަރު މަހު ނ.ހޮޅުދޫގައި ދިރިއުޅޭ ގޭގައި މަރުވެފައި އޮއްވާ ފެނުނު ޒަކިއްޔާ މޫސާއަށް މީހަކު ހަމަލާދީ މަރާލި ކަމުގެ ހެއްކެއް ނެތްކަމަށް ފުލުހުން މިއަދު ބުނެފިއެވެ.
ދިވެހި ފުލުހުންގެ ޚިދުމަތުން މިއަދު ބޭއްވި ނޫސްވެރިންގެ ބައްދަލުވުމުގައި ބުނީ ޒަކިއްޔާ މަރުވީ ކަރަށް ލިބުނު ޒަޚަމްތަކުގެ ސަބަބުން ކަމަށެވެ. ކަރުގައި ފުން ޒަޚަމްތަކެއް ހުރި ކަމަށް ފުލުހުން ބުންޏެވެ. އެގޮތުން ވާތް ފަރާތުގައި ފުން ތިން ޒަޚަމެއް އަދި ކަނާތް ފަރާތުގައި ފުން ދެ ޒަޚަމެއް ހުރިކަމަށް ފުލުހުން ބުންޏެވެ. އަދި ޒަކިއްޔާ މަރުވެފައި އޮއްވާ ފެނުނު އޭނާ ދިރިއުޅޭ ގުދަން ތެރެއިން ވަޅިއެއްވެސް ފެނުނު ކަމަށް ފުލުހުން ބުންޏެވެ. އެކަމަކު އެއިން އެއްވެސް ކަމަކާ އެހެން މީހަކާ ގުޅުވޭނެ ހެއްކެއް ނެތް ކަމަށް ފުލުހުން ބުންޏެވެ.
ވަޅީގައިވެސް ހުރީ ޒަކިއްޔާގެ ލޭ ކަމަސް ތަހުލީލުތަކަށް ރިއާޔަތްކޮށް ފުލުހުން ބުންޏެވެ. ފުލުހުން ބުނީ ޒަކިއްޔާ މަރުވެފައި އޮއްވާ ފެނުނު ގުދަން ތެރެއަށް އިތުރު މީހަކު ވަން ކަމުގެ ހެއްކެއްވެސް ނެތް ކަމަށެވެ.
" ކުށުގެ ވެށިން އަދި ދިރިއުޅޭ ގެއިން އަދި ޒަކިއްޔާގެ ހަށިގަނޑުންވެސް އެއްވެސް އިތުރު ފަރާތެއްގެ ފުށުން ލިބިފައިވާ އަނިޔާއެއް ފާހަގަކުރެވިފައެއް ނެތް" ސާމިހު ވިދާޅުވިއެވެ.
ޗީފް އިންސްޕެކްޓަރ އޮފް ޕޮލިސް މުޙައްމަދު ސާމިހު ވިދާޅުވީ މީގެކުރިންވެސް މިބާވަތުގެ އަނިޔާތައް މިގޮތަށް ލިބިގެން ފުލުހުން ތަހުގީގު ކޮށްފައިވާނެ ކަމަށެވެ. ޒަކިއްޔާއަށް ލިބިފައިވާ ޒަޚަމްތަކަކީ އަމިއްލައަށް ނުދެވޭނެ ޒަޚަމްތަކެއް ކަމަށް ބުނަން ދަތި ކަމަށް ވިދާޅުވިއެވެ,.
ފުލުހުންގެ ނޫސްކޮންފަރެންސަށްފަހު ހޮޅުދޫ ރައްޔިތުންގެ ސޯޝަލް މީޑިޔާގެ ވަސީލަތްތަކުގައި ދަނީ ތަހުގީގާ މެދު ސުވާލު އުފައްދަމުންނެވެ. އަދި ތަހުގީގުގައި ފުލުހުން ދެއްކި ވާހަކަތައް ގަބޫލުކުރަން ދަތިކަމަށް ދަނީ ބުނަމުންނެވެ.
50 އަހަރުގެ ޒަކިއްޔާ މަރުވެފައި އޮއްވާ ފެނުނީ ސެޕްޓެމްބަރު މަހުގެ 10 ވަނަ ދުވަހު އެވެ. އެމަރަށް އިންސާފް ނުލިބި, އަދި ސަބަބުވެސް ނޭންގި ގިނަ ދުވަސްވާތީ މިދިޔަ މަހު އެރަށުގައި, ރައްޔިތުން ވަނީ އަޑު އުފުލާ އިހުތިޖާޖުވެސް ކޮށްފައެވެ.
ރިއެކްޝަންސް
