އޮކްޓޫބަރު މަހު ބާޒާރުގައި ތަކެތީގެ އަގު ދަށަށް
މިދިޔަ ސެޕްޓެމްބަރު މަހާ އަޅާބަލާއިރު އޮކްޓޫބަރު މަހު ރާއްޖޭގެ އިންފްލޭޝަން ނުވަތަ ބާޒާރުގައި ތަކެތީގެ އަގު ދަށަށް ގޮސްފައިވާ ކަމަށް ތަފާސްހިސާބުން ދައްކައިފިއެވެ.
ރާއްޖޭގެ ތަފާސް ހިސާބާބެހޭ މައި އިދާރާ، ނޭޝަނަލް ބިއުރޯ އޮފް ސްޓެޓިސްޓިކްސްއިން އާންމު ކޮށްފައިވާ ތަފާސް ހިސާބުން ދައްކާ ގޮތުން މިދިޔަ ސެޕްޓެމްބަރު މަހާއަޅާ ބަލާއިރު އޮކްޓޫބަރު މަހު ބާޒާރުގައި ތަކެތީގެ އަގު 0.16 އިންސައްތަ ވަނީ ދަށަށް ގޮސްފައެވެ.
ސްޓެޓީސްޓިކްސް ބިއުރޯއިން އާންމު ކޮށްފައިވާ އިންފްލޭޝަން ރިޕޯޓުގައިވާ ގޮތުން އޮކްޓޫބަރު މަހު އެންމެ ބޮޑަށް ދަށަށް ގޮސްފައިވަނީ ތަރުކާރީގެ ބައިންނެވެ. އެގޮތުން ތަރުކާރީގެ ބައިން 3.91 އިންސައްތަ ވަނީ ދަށްވެފައެވެ. އަދި މޭވާގެ ބައިން 1 އިންސައްތަވެސް ވަނީ ދަށަށް ގޮސްފައެވެ.
މޭވާއާއި ތަރުކާރީގެ ބާވަތްތައް ފިޔަވައި ކެއުމަށް ބޭނުންކުރާ އެހެނިހެން ބާވަތްތަކުގެ އަގުތައްވެސް މިއަހަރުގެ ސެޕްޓެމްބަރ މަހާއި އަޅާބަލާއިރު އޮކްޓޯބަރ މަހުގެ ތެރޭގައި 0.44 އިންސައްތަ ވަނީ ދަށްވެފައެވެ.
ކެއުމަށް ބޭނުންކުރާ ބާވަތްތަކުގެ އަގު އޮކްޓޯބަރު މަހު ދަށްވެފައިވާއިރު އަގު އެންމެ ބޮޑަށް ދަށްވެފައިވާ ބާވަތްތަކުގެ ތެރޭގައި ފިޔާ، ލުނބޯ، ލޮނުމެދު، ގިތެޔޮ މިރުސް، ކެރެޓް ފަދަ އާންމުކޮށް ބޭނުންކުރާ ބާވަތްތައް ހިމެނެއެވެ.
މީގެ އިތުރުން ގޭބިސީތަކުގެ ކަރަންޓު ބިލުތަކުން 2.64 އިންސައްތަ ވަނީ ދަށްވެފައިވާ ކަމަށްވެސް އިންފްލޭޝަން ރިޕޯޓުން ދައްކަވައެވެ.
ރިއެކްޝަންސް
