ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކޮށް މަސްތުވާތަކެއްޗާބެހޭ ގާނޫނަށް ބޮޑެތި އިސްލާހުތަކެއް
ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކުރުމާއެކު މަސްތުވާތަކެއްޗަށް ދެވިހިފާފައިވާ މީހުންގެ ފަރުވާގެ ނިޒާމު ހަރުދަނާކުރުން ހިމަނައިގެން މަސްތުވާތަކެއްޗާބެހޭ ގާނޫނަށް ބޮޑެތި އިސްލާހުތަކެއް ހިމަނާފައިވާ ބިލު ރައްޔިތުންގެ މަޖިލީހަށް ހުށަހަޅައިފިއެވެ.
ސަރުކާރުގެ ފަރާތުން މި ބިލު ރައްޔިތުންގެ މަޖިލީހަށް ހުށަހެޅުއްވީ ގަމުދާއިރާގެ މެންބަރު ޔޫސުފް ނަޝީދެވެ.
މި ބިލު ހުށަހެޅުއްވި ސަބަބާ ގުޅޭ ގޮތުން މެންބަރު ވިދާޅުވީ ރާއްޖޭގައި މަސްތުވާތަކެތީގެ ވިޔަފާރިކުރުމާއި ޓްރެފިކް ކުރުމުގެ ވިޔަފާރި އިތުރަށް ފުޅާވެ އަދި އެތަކެތި ބޭނުންކުރާ މިންވަރުވެސް އިތުރުވަމުން އަންނަ ކަމަށެވެ.
އަދި މަސްތުވާތަކެއްޗާ ގުޅޭ ކުށްތައް އިތުރުވަމުންދާތީ އެކަން ހުއްޓުވުމަށްޓަކައި ގާނޫނުތަންފީޒު ކުރާ ފަރާތްތަކަށް ލިބިދޭ ބާރުތައް އިތުރުކުރުމަށާއި މަސްތުވާތަކެއްޗަށް ދެވިހިފާފައިވާ މީހުންނަށް ހަރުދަނާ ގޮތެއްގައި ފަރުވާ ދިނުމަށާއި އެފަރާތްތައް ހެޔޮގޮތުގައި މުޖުތަމައަށް އަނބުރާ ރުޖޫއަ ވެވޭނެ ފުރުސަތު ހޯދައިދިނުމަކީވެސް މި އިސްލާހު ހުށަހެޅުމުގެ ބޭނުމެއް ކަމަށެވެ.
އެގޮތުން މައިގަނޑު 8 ކަމެއް ވަނީ މި ބިލުގައި ފާހަގަ ކުރައްވާފައެވެ.
އެގޮތުން:
- ގާނޫނުގެދަށުން ކޮންތްރޯލް ކޮށްފައިވާ މަސްތުވާތަކެތި އިތުރުން އަލަށް ކޮންޓްރޯލް ކުރަންޖެހޭ މަސްތުވާތަކެތި ކޮންޓްރޯލްކުރެވޭނެ ނިޒާމެއް ތަޢާރަފް ކުރުން.
- މަސްތުވާ ތަކެއްޗާގުޅޭ އިތުރު ކުށާއި އަދަބު ކަނޑައެޅުން.
- މަސްތުވާތަކެއްޗަށް ދެވިހިފާފައިވާ މީހުންނަށް ދެވޭ ފަރުވާގެ ނިޒާމު އިތުރަށް ހަރުދަނާކުރުން.
- ޑްރަގް ކޯޓު ހިންގުމުގެ އުސޫލްތަކާއި ޑްރަގް ކޯޓުގެ ފަރުވާގެ ޕްރޮގްރާމާ ގުޅޭ އުސޫލުތައް މުރާޖާ ކުރުން.
- މަސްތުވާތަކެއްޗާ ގުޅުންހުރި ކަންކަން ހުއްޓުވުމަށްޓަކައި ގާނޫނު ތަންފީޒުކުރާ އިދާރާތަކަށް އިތުރު ބާރުތައް ލިބިދިނުން.
- ކުށް ކޮށްގެން ހޯދާ މުދާ ހިފެހެއްޓުމާއި އެފަދަ މުދާ ދައުލަތަށް ނެގުމުގެ އުސޫލު މުރާޖާ ކުރުން.
- އެނޫންވެސް ގާނޫނު ތަންފީޒުކުރުން ހަރުދަނާ ކުރުމަށްޓަކައި ގެންނަންޖެހޭ އިސްލާހުތައް ގެނައުން.
ރިއެކްޝަންސް
