ގެދޮރުވެރިކަމުގެ ލޯނަށް އަހަރަކު އެއް ބިލިއަން, ޕްރޮގްރާމް އިފްތިތާހުކޮށްފި
ގެދޮރުވެރިކަމަށް ހައްލެއް ހޯދައިދިނުމަށް ސަރުކާރުގެ 'ހިޔާވަހި ފައިނޭންސް ޕްރޮގްރާމް' އިފްތިތާހު ކޮށްފިއެވެ. ޕްރޮގްރާމް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އެވެ.
މިޕްރޮގްރާމް އިފްތިތާހުކުރި އިރު އަންނަ އަހަރަށް ލަފާކުރާ ދައުލަތުގެ ބަޖެޓްގައި ވަނީ އެޕްރޮގްރާމަށް އެއް ބިލިއަން ރުފިޔާ ހިމަނާފައެވެ. އަދި ގެދޮރުވެރިކަމުގެ އެހެން ޕްރޮގްރާމްތަކަށް ވެސް ވަނީ 4.8 ބިލިއަން ރުފިޔާ ހިމަނާފައެވެ.
ގެދޮރުވެރިކަމުގެ މަޝްރޫއުތަކަށް އެއަދަދު ކުރިއަށް އޮތް ހަތަރު އަހަރުވެސް ހިމަނުއްވާ, އެމައްސަލައަށް ހައްލު ހޯއްދަވައިދެއްވަން މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. ރައީސްގެ އަމާޒަކީ 2028 ވަނަ އަހަރު ނިމޭއިރު ގެދޮރު ނުލިބޭ މީހަކު ނެތުމެވެ. ހިޔާވަހި ފައިނޭންސް ޕްރޮގްރާމް އިފްތިތާހުކުރުމަށް ބޭއްވި ރަސްމިއްޔާތުގައި ގެދޮރުވެރިކަމާ ބެހޭ ވަޒީރު ޑރ.އަލީ ހައިދަރު ވިދާޅުވީ މި އިފްތިތާޙްކުރެވެނީ ބޯހިޔާވަހިކަން ހޯދުމުގައި ރައްޔިތުންނަށް މާލީގޮތުން ދިމާވެފައިވާ ދަތިތައް ހައްލުކުރުމަށް ހުޅުވާލެވޭ މުހިންމު ފިޔަވަޅެއް ކަމަށެވެ. ވަޒީރު ވިދާޅުވީ ހިޔާވެހި ފައިނޭންސް ޕްރޮގްރާމަކީ ބޯހިޔާވަހިކަން ހޯދުމުގައި ރައްޔިތުންނަށް މާލީގޮތުން ދިމާވެފައިވާ ދަތިތައް ހައްލުކުރުމަށް ހުޅުވާލެވޭ މުހިންމު ދޮރުއައްޓެއް ކަމަށެވެ.
ހިޔާވެހި ފައިނޭންސް ޕްރޮގްރާމްގައި ހިމެނޭ ވަސީލަތްތަކުގެ އެހީގައި، މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށް ގިނަ އާއިލާތަކަކަށް ގެދޮރުގެ ތަނަވަސްކަން ލިބޭނެ ކަމަށް ވަޒީރު ވިދާޅުވިއެވެ.
ހިޔާވެހި ފައިނޭންސް ޕްރޮގްރާމްގެ އުސޫލުތަކާއި، ޝަރުތުތަކާއި އިތުރު ތަފްސީލު މި ހަފުތާ ނިމުމުގެކުރިން އާންމުކުރެވޭނެ ކަމަށް ވަޒީރު ވިދާޅުވިއެވެ.
ގެދޮރުވެރިކަމުގެ މައްސަލައަށް ހައްލު ހޯދައިދިނުމަކީ މިސަރުކާރުގެ އެންމެ ބޮޑު ވައުދެވެ. އަދި އެންމެ ބޮޑު ސިޔާސަތެވެ.
ރިއެކްޝަންސް
