ބަޖެޓް ފާސްވާއިރު ޤާނޫނުން ކަނޑައެޅިފައިވާ މިންވަރު ކައުންސިލްތަކަށް ލިބޭނެ- ރައީސް
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލިހުން ފާސްކުރާއިރު ޤާނޫނުން ކަނޑައެޅިފައިވާ މިންވަރު ކައުންސިލްތަކަށް ލިބޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިޔަގީންކަން ދެއްވާފައި މިވަނީ ދައުލަތުން އަންނަ އަހަރަށް ލަފާކުރައްވާ ބަޖެޓް ރައްޔިތުންގެ މަޖިލިހަށް ހުށަހެޅުއްވިއިރު ކައުންސިލުންތަކަށް ޤާނޫނުން ކަނޑައަޅާފައިވާ މިންވަރު ހިމަނާފައި ނެތުމުގެ ކަންބޮޑުވުން ސިޓީތަކުގެ މޭޔަރުންނާއި, ބައެއް ކައުންސިލްތަކުގެ ރައީސުންވެސް ފާޅުކުރައްވަމުން ގެންދަވަނިކޮށެވެ. އަދި އިދިކޮޅު ފަރާތްތަކުން އެކަމަށް ފާޑުކިޔަމުން ދަނިކޮށެވެ.
މިއަދު ޕެޓް ކެއަރ ފެސިލިޓީ ހުޅުވުމަށް ހުޅުމާލެ ދެވަނަ ފިޔަވަހީގައި ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ވިދާޅުވީ މި ފަހަރުގެ ބަޖެޓް ފާސްވާއިރުގައިވެސް ޤާނޫނުގައި އޮތް ގޮތަށް ބްލޮކް ގްރާންޓުގެ ގޮތުގައި ފަސް އިންސައްތަ ކައުންސިލްތަކަށް ލިބޭނެކަމަށެވެ.
ރައީސުލްޖުމްހޫރިއްޔާ ވިދާޅުވީ ކައުންސިލްތަކަށް ލިބޭ އާމްދަނީ އިތުރުކުރުމަށް ކައުންސިލްތަކަށް ފަޅުރަށްތައް ލިބޭނެ މަގުފަހިކޮށްދެއްވުމާއި، ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލްތަކަށް ޖަމާކޮށްދިނުމަށް ނިންމާމަވާފައިވާކަމަށެވެ.
ބްލޮކް ގްރާންޓުގެ 5 އިންސައްތައިގެ އިތުރަށް ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލުތަކަށް ލިބޭގޮތް ހެދުމަށް ޤާނޫނަށް އިސްލާހު ގެނައުމަށް ފޮނުއްވާނެކަމަށްވެސް ރައީސް ވިދާޅުވިއެވެ. މީގެ އިތުރަށްވެސް ޤާނޫނުގައި ލިޔެވިފައިހުރި، މިއަދާ ހަމައަށް ނުކޮށްހުރި ކަންތައްތަކެއް ކުރިއަށް އޮތް ހަފުތާއެއް ނުވަތަ ދެހަފުތާއެއްގެ ތެރޭގައި ކައުންސިލްތަކަށް ހަވާލުކުރުމަށްޓަކައި ވަޒީރުންގެ މަޖިލީހުގައި މަޝްވަރާތައް ހިނގަމުންދާކަމަށް އެމަނިކުފާނު ވިދާޅުވިއެވެ
ރައީސުލްޖުމްހޫރިއްޔާ ވިދާޅުވީ ކައުންސިލްތައް ލާމަރުކަޒީ ނިޒާމުގެ ތެރެއިން ބާރުވެރިކުރުވައިގެން ކައުންސިލްތައް މެދުވެރިކޮށް ކަންތައްތައް ކުރުމުގައި މި ސަރުކާރުން ގެންދަނީ ޢަމަލާ ބަހާ ދިމާކުރަމުންކަމަށެވެ. އަދި މިއަދު ހުޅުވިގެންދާ "އޮޅު ހިޔާ" އަކީ އެކަމުގެ ނަތީޖާއެއްކަމަށް ވިދާޅުވިއެވެ.
ބަޖެޓްފާސްވާއިރު ކައުންސިލްތަކަށް ޤާނޫނުގައި ކަނޑައެޅިފައިވާ މިންވަރު ލިބޭނެކަމަށް ރައީސުލްޖުމްހޫރިއްޔާ ވިދާޅުވުމުންވެސް އިދިކޮޅު ފަރާތްތަކުން ގެންދަވަނީ ފާޑުކިޔަމުންނެވެ. އެގޮތުން ރައްޔިތުންގެ މަޖިލިހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ވަނީ ބަޖެޓު ފޮނުވިއިރު އެ އަދަދުތައް ކަނޑާލާފަ ފޮނުވުމުން ސުވާލު އުފައްދަވާފައެވެ. މީކާއީލް ސުވާލުކުރެއްވީ ރައީސްގެ އެނިންމެވުމަކީ ހުރިހާ މޭޔަރުން ބަޔާން ނެރުމުން ނިންމެވި ނިންމެވުމެއްތޯއެވެ.
ރިއެކްޝަންސް
