މިހާރު ކުރިއަށްދާ ކުރަނގި އޮޕަރޭޝަން ފެބްރުއަރީ މަހު ނިންމާލެވޭނެ: ވަޒީރު އިހުސާނު

ދިވެހިރާއްޖޭގައި ގަވާއިދާ ޚިލާފަށް އުޅެމުން އަންނަ ބިދޭސީންގެ މައްސަލަ ހައްލު ކުރުމަށް ސަރުކާރުން ހިންގަމުން އަންނަ ބޮޑު އޮޕަރޭޝަން، "ކުރަނގި"ގެ ފުރަތަމަ ފޭސްގެ މަސައްކަތް އަންނަ ފެބްރުއަރީ މަހުގެ ތެރޭގައި ނިންމާލެވޭނެ ކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވެއްޖެއެވެ.

އޮޕަރޭޝަން ކުރަނގި ގެ ފުރަތަމަ ފޭސް ނިންމުމަށް ކުރިން އަމާޒު ހިފާފައިވަނީ އަންނަ މާޗު މަހުގެ ތެރޭގައެވެ.

އޮޕަރޭޝަން ކުރަނގިއަކީ ރާއްޖޭގައި ދިރިއުޅޭ އެންމެހައި ބިދޭސީންގެ ބަޔޯމެޓްރިކްސް ނެގުމަށް ހޯމް މިނިސްޓްރީން މުޅި ރާއްޖޭގައި ހިންގަމުން އަންނަ އޮޕަރޭޝަނެކެވެ.

ބިދޭސީންގެ މައްސަލަ ހައްލު ކުރުމަށް ސަރުކާރުން ކުރައްވަމުން އަންނަ މަސައްކަތުގެ ތެރެއިން ސަރުކާރުން އަންނަނީ ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީން ހޯދައި އޭގެ ތެރެއިން ދާޚިލީ ސަލާމަތަށް ނުރައްކާވާ ފަރާތްތަކަށް ރާއްޖެ ނާދެވޭ ގޮތަށް ޑީޕޯޓުވެސް ކުރަމުންނެވެ.

މިއަދު ރައްޔިތުންގެ މަޖިލީހުގައި ވަޒީރުންނާ ސުވާލު ކުރުމުގެ ބައިގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން ދާޚިލީ ވަޒީރު ވިދާޅުވީ ގަވާއިދާ ޚިލާފަށް ރާއްޖޭގައި ވިޔަފާރީގެ ކަންކަމުގައި އުޅެމުންދިޔަ  4428 މީހަކު މިދިޔަ މަހާ ހަމައަށް ޑީޕޯޓު ކޮށްފައިވާ ކަމަށް ވަޒީރު ވިދާޅުވިއެވެ.  

ބިދޭސީން ޑީޕޯޓު ކުރުމުން ރާއްޖޭގެ އިގްތިޞާދަށް އެއްވެސް ފައިދާއެއް ވެފައިވޭތޯ ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހްމަދު ދީދީ ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ ގަވާއިދާ ޚިލާފަށް ރާއްޖޭގައި ވިޔަފާރި ކުރަމުން ދިޔަ ބަޔަކު ހުއްޓުވައި އެމީހުން ފޮނުވާލުމުން ދިވެހި ވިޔާފާރިތަކަށް އެކަމުގެ ސަބަބުން ފުރުސަތުތަކެއް ފަހިވެގެން އަންނާނެ ކަމަށެވެ.

"މިކަމުގެ ސަބަބުން ދިވެހި އިގްތިޞާދުތެރޭގައި ހިފެހެއްޓެންޖެހޭ ފައިސާ ހަމަ ޔަގީނުންވެސް މިހާރު ކުރިއަށްވުރެ ރަނގަޅުވާނެ" ވަޒީރު އިހުސާނު ވިދާޅުވިއެވެ.

އިހުސާނު ވިދާޅުވީ ރާއްޖޭގައި ގަވާއިދާ ޚިލާފަށް އުޅެމުން އަންނަ ބިދޭސީން ގަވާއިދުގެ ތެރެއަށް ގެނައުމުގެ މަސައްކަތްވެސް ކުރައްވަމުން ގެންދަވާ ކަމަށެވެ.

ވަޒީރު ވިދާޅުވި ގޮތުގައި ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ރާއްޖޭގައި ދިރިއުޅޭ ބިދޭސީންގެ ތެރެއިން ދެބައި ކޮށްފަ އެއްބައި މީހުން ދައުލަތަށް ދައްކަން ޖެހޭ ފައިސާވެސް ނުދައްކާ ކަމަށެވެ.

އެގޮތުން މިދިޔަ ޖޫންމަހާ ހަމައަށް 1.7 ބިލިއަން ރުފިޔާ ނުދައްކާ އޮތް ކަމަށާއި އޭގެ ތެރއިން ބިލިއަނެއްހާ ރުފިޔާ ދައުލަތަށް ހޯދާފައިވާ ކަމަށްވެސް ވަޒީރު ވިދާޅުވިއެވެ.

ދާޚިލީ ވަޒީރު ވިދާޅުވީ އޮޕަރޭޝަން ކުރަނގީގެ މަސައްކަތް މިހާތަނަށް 96 ރަށެއްގައި މަސައްކަތް ފެށިފައިވާ ކަމަށާއި 21 ރަށެއްގައި މަސައްކަތް އެއްކޮށް ނިމި 8385 ބިދޭސީންގެ މައުލޫމާތު ނަގައި ނިމިފައިވާ ކަމަށެވެ.