ގަވާއިދާ ހިލާފަށް ސިނގިރޭޓް ވިޔަފާރި ކުރަމުންދިޔަ ބަނގްލަދޭޝް މީހަކު ހައްޔަރުކޮށްފި
ސިނގިރޭޓް ބަންދުކުރާ ސާމާނާއި, ގިނަ އަދަދެއްގެ ފައިސާ ފެނުނު
ގަވާއިދާ ހިލާފަށް ސިނގިރޭޓް ވިޔަފާރި ކުރަމުންދިޔަ ބަނގްލަދޭޝް މީހަކު ހައްޔަރުކޮށްފިއެވެ. ހައްޔަރުކުރީ 32 އަހަރުގެ އެމްޑީ ސައްދާމް ހުސައިން އެވެ.
މިއަދު އޭނާ ހައްޔަރުކުރީ ހުޅުމާލެ ފޭސް 1 ގެ ކަންނެލި ޖެޓީ ކައިރިން ކަމަށް ފުލުހުން ވިދާޅުވިއެވެ. ހައްޔަރުކުރީ ރަށުތެރެ ޕެޓްރޯލް ކުރަމުންދިޔަ ފުލުހުން ފެނުމުން އޭނާގެ އަމަލުތައް ހުރިގޮތުން ޝައްކުކުރެވި ބަލާފާސްކުރި އިރު ސިނގިރޭޓް ބަންދުކުރުމަށް ބޭނުންކުރާ އާލާތްތައް ފެނިގެން ކަމަށް ފުލުހުން ވިދާޅުވިއެވެ.
އޭނާ ހައްޔަރުކޮށް ބަލާ ފާސްކުރިއިރު ގިނަ އަދަދެއްގެ ސިނގިރޭޓް ފޮއްޓާއި, ދުންފަތާއި, ސިނގިރޭޓް ފިލްޓަރ އަދި ރިޒްލާ އާއި ސިނގިރޭޓް އަނބުރަން ބޭނުންކުރާ ބޮކްސްއެއް ފެނުނު ކަމަށް ފުލުހުން ވިދާޅުވިއެވެ. މީގެއިތުރުން 53,000 އަށްވުރެ ގިނަ ދިވެހި ރުފިޔާވެސް ފެނުނު ކަމަށް ފުލުހުން ވިދާޅުވިއެވެ.
ގަވާއިދާ ހިލާފަށް ސިނގިރޭޓްގެ ވިޔަފާރިކުރާ ކަމަށް ތުހުމަތުކޮށް, އެމީހާ ހައްޔަރުކޮށްފައިވާ ކަމަށް ފުލުހުން ވިދާޅުވިއެވެ. އަދި މައްސަލަ ތަހުގީގު ކުރަމުންދާކަމަށްވެސް ފުލުހުން ވިދާޅުވިއެވެ.
ރިއެކްޝަންސް
