މަސްތުވާތަކެއްޗާއެކު އަންހެން ފުލުހެއް ހައްޔަރުކޮށްފި
މައްސަލާގައި އިތުރު މީހަކުވެސް ހައްޔަރުކުރި
މަސްތުވާތަކެއްޗާއެކު އަންހެން ފުލުހެއް ހައްޔަރުކޮށްފިއެވެ.
މަސްތުވާތަކެއްޗާއެކު ފުލުހުން ހައްޔަރުކުރި ފުލުހަކީ އދ. ކުނބުރުދޫ / ދިލްބަހާރުގެ، އައިޝަތު ޝިޔާޒާ (31އ) އެވެ. މިމައްސަލާގައި އޭނާއާއެކު ހއ. ދިއްދޫ / ހަޒާރުމާގެ، ސައިފުﷲ އަޙްމަދު (26އ) ވެސް ފުލުހުން ހައްޔަރުކުރިއެވެ.
އެދެމީހުން ހައްޔަރުކުރީ ޑްރަގް އެންފޯސްމަންޓާއި ފުލުހުންގެ އިންޓެލިޖެންސް ގުޅިގެން މާލޭގައި އިއްޔެ ހިންގި އޮޕަރޭޝަނެއްގައި ކަމަށް ދިވެހި ފުލުހުންގެ ޚިދުމަތުން ވިދާޅުވިއެވެ. މިއީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްކަމަށްވެސް އެޚިދުމަތުން ވިދާޅުވިއެވެ.
އެދެމީހުން ހުއްޓުވައި ފުލުހުންގެ ބެލުމުގެ ދަށަށް ގެންދިޔައީ ވިޔަފާރަވެރިންގެ މިސްކިތް ކައިރިންކަމަށް ފުލުހުން ވިދާޅުވިއެވެ. އެދެމީހުން ފުލުހުންގެ ބެލުމުގެ ދަށަށް ގެންގޮސް ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި ތިން ރަބަރު ޕެކެޓާއި މަނާ ބޭސް ގުޅައެއް ފެނުނު ކަމަށް ފުލުހުން ވިދާޅުވިއެވެ.
މިމައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން އައިޝަތު ޝިޔާޒާ 5 ދުވަހަށް އަދި ސައިފުﷲ އަޙްމަދު 10 ދުވަހަށް ބަންދުކުރަން ކޯޓުން ވަނީ އަމުރުކޮށްފައެވެ.
ފުލުހުން ވިދާޅުވީ މައްސަލަ ޑްރަގް އެންފޯސްމަންޓުން ތަހުގީގު ކުރަމުންދާކަމަށެވެ.
ރިއެކްޝަންސް
