ރާއްޖޭގެ ހައްޖުވެރިންނަށް ސައުދީގައި ފުރަތަމަ ފަހަރަށް ޚާއްސަ ކްލިނިކެއް
ރާއްޖޭގެ ހައްޖުވެރިންނަށް ޚާއްސަކޮށްގެން ސައުދީ އަރަބިއާގައި ފުރަތަމަ ފަހަރަށް ޚާއްސަ ކްލިނިކެއް ގާއިމްކުރުމުގެ މަސައްކަތް ފަށައިފިއެވެ.
މިކަން ހާމަކުރައްވާފައި ވަނީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ.
މިނިސްޓަރު ޝަހީމް ސޯސަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މި ކްލިނިކް ގާއިމްކުރުމަށް ސައުދީ ސަރުކާރުން ހައްޖު މިޝަނަށް ރަސްމީކޮށް މިހާރު ހުއްދަ ދީފައިވާ ކަމަށެވެ. މި ކްލިނިކް ގާއިމްކުރަނީ މައްކާގެ އަބީރު ހޮސްޕިޓަލާ ގުޅިގެން، ހައްޖު ކޯޕަރޭޝަންގެ ހޮޓަލުގައި ކަމަށް ޝަހީމް ވިދާޅުވިއެވެ.
މި ކްލިނިކުގައި ސިއްހީ ފުރިހަމަ ނިޒާމެއް ގާއިމްކުރެވި، ބޭސްފަރުވާ އާއި ހޮސްޕިޓަލް އެނދު ވެސް ލިބެން ހުންނާނެ ކަމަށް މިނިސްޓަރު ޝަހީމް ވިދާޅުވިއެވެ. އަދި މިއީ ސައުދީ ހޮސްޕިޓަލަކާ ގުޅިގެން ރަސްމީކޮށް ކްލިނިކެއް ގާއިމްކުރެވޭ ފުރަތަމަ ފަހަރު ކަމަށްވެސް މިނިސްޓަރު ފާހަގަކުރެއްވިއެވެ.
މިއަހަރުގެ ހައްޖު މަހާ ގުޅިގެން، ރާއްޖެއިން ހައްޖަށް ދާ މީހުން އަންނަ ހޯމަ ދުވަހު ފުރަން ފަށާނެއެވެ. ކަލަންޑަރުގައިވާ ގޮތުން، މި އަހަރުގެ ހައްޖު ދުވަހަށް ވާނީ އަންނަ މަހުގެ 5 ވަނަ ދުވަހަށެވެ.
ރިއެކްޝަންސް
