ޖުލައި ނިމުމުގެ ކުރިން ރ. އަތޮޅާއި ބ.އަތޮޅުގައި އާރުޓީއެލް ފަށާނެ ކަމުގެ ޔަގީންކަން ދެއްވައިފި
ޖޫން މަސް ނިމުމުގެ ކުރިން ރ.އަތޮޅުގައި ޚިދުމަތް ފަށަނީ
މިއަހަރުގެ ޖުލައި މަސް ނިމުމުގެ ކުރިން ރ. އަތޮޅާއި ބ.އަތޮޅުގައި އާރުޓީއެލް ފަށާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ދެއްވައިފި އެވެ. އެމަނިކުފާނު މިޔަގީންކަން ދެއްވީ މިހާރު ރ.އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރ.އުނގޫފާރަށް ވަޑައިގެން އެރަށުގެ ރައްޔިތުންނަށް ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވީ ރ.އަތޮޅުގެ ތަރައްޤީގައި ދަތުރުފަތުރުގެ ނިޒާމުގެ މުހިންމުކަން ބޮޑު ކަމަށާއި، އެ ގޮތުން ރާއްޖެ ޓްރާންސްޕޯރޓް ލިންކް (އާރް.ޓީ.އެލް)ގެ ޚިދުމަތް ދެން އެންމެ އަވަހަށް ޤާއިމުވެގެންދާނެ އަތޮޅަކީ ރ.އަތޮޅު ކަމުގައި ރައީސުލްޖުމްހޫރިއްޔާ ވިދާޅުވެއްޖެއެވެ.
ރައީސް ވިދާޅުވީ ޖޫން މަސް ނިމުމުގެ ކުރިން ރ.އަތޮޅުގައި އަދި ޖުލައި މަސް ނިމުމުގެ ކުރިން ބ. އަތޮޅުގައި އާރް.ޓީ.އެލްގެ ޚިދުމަތް ފަށްޓަވާނެ ކަމަށެވެ. މިސަރުކާރު ވެރިކަމާ ހަވާލުވި ފަހުން އާރުޓީއެލްގެ ޚިދުމަތް ފެށީ ނ.އަތޮޅުގައެވެ. އިތުރު އަތޮޅުތަކުގައި ޚިދުމަތް ފަށަން ބޭނުންވާ ލޯންޗް ފެރީ ބަނދެދޭނެ ފަރާތެއް ހޯދަން އެމްޓީސީސީން ވަނީ އިއުލާނުކޮށްފައެވެ.
މިހާރު ހއ. އަތޮޅުން ފެށިގެން ނ އަތޮޅާ ހަމައަށް އާރުޓީއެލްގެ ޚިދުމަތް ދެއެވެ. އަދި ޅ.އަތޮޅުގައިވެސް ޚިދުމަތް ދެއެވެ. ދެކުނުން ހުވަދު އަތޮޅާއި އައްޑޫ ސިޓީއާއި ފުވައްމުލައް ވަނީ އާރުޓީއެލްގެ ނިޒާމުން ގުޅާލާފައެވެ.
ރިއެކްޝަންސް
