ރާއްޖޭގައި 'ރޫހާނީ ފަރުވާ' ދޭ ކަމަށްބުނާ ހިންދޫ ދީނުގެ ކަހީނެއްގެ މައްސަލަ ބަލަނީ
"މާސްޓަރ ދުރްގާ ރާއޯ ގުރުޖީ" ކިޔާ ފޭސްބުކް ޕޭޖެއްގައި މީހަކު ރާއްޖޭގައި ރޫހާނީ ފަރުވާ ދޭކަމަށްބުނާ މައްސަލައެއް ފުލުހުން ބަލަންފަށައިފިއެވެ. ހިންދޫ ދީނުގެ ހާމުދުރެއް ރާއްޖޭގައި ރޫހާނީ ފަރުވާދޭކަމަށް ބުނެ މީސްމީޑިއާގައި އިޝްތިހާރު ކުރަމުންދާ މައްސަލަ ސަމާލުކަމަށް އައިސްފައިވާ ކަމުގައި ފުލުހުންވަނީ ބުނެފައެވެ.
ޖަހާފައިވާ ޕޯސްޓްތަކަށް ބަލާއިރު އޭނާ މިވަގުތުވެސް ހުރީ ރާއްޖޭގައެވެ. އަދި އެޕޮއިންޓްމަންޓް ހެއްދުމަށް ރާއްޖޭގެ ފޯނު ނަންބަރެއްވެސް ހިއްސާކޮށްފައި ވެއެވެ.
އެމައްސަލަ ލިބިފައިވާ ކަމަށާއި މައްސަލަ ބަލަމުންދާކަމަށް ފުލުހުން ވިދާޅުވީ މީޑިއާތަކަށް ފޮނުވި މެސެޖެއްގައެވެ. އަދި އެކަމާ ގުޅިގެން ޤާނޫނީގޮތުން އަޅަންޖެހޭ ފިޔަވަޅުތައް އެޅުމަށް ކަމަބޭހޭ މުއައްސަސާތަކާއެކު ގުޅިގެން މަސައްކަތް ކުރަމުންދާ ކަމަށްވެސް ފުލުހުން ބުނެފައިވެއެވެ.
ފުލުހުންގެ މެސެޖުގައި ވަނީ ދިވެހިންގެ ސަގާފަތާއި ދީނާއި ހިލާފު މިފަދަ ކަންކަމުގެ މަޢުލޫމާތު ވީއެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް މިފަދަ އިޝްތިހާތެއް ފެނިވަޑައިގެންފިނަމަ ލަސްނުކުރައްވާ ފުލުހުންނަށް އަންގަވައިދެއްވުމަށް އިލްތިމާސްކޮށްފައެވެ.
އެ ޕޭޖްގައި ވާ އިޝްތިހާރުގައި ވާގޮތުން އެމީހާއަކީ ސިހުރު ރަނގަޅު ކުރުމާއި, އަތްބެލުމާއި ވަރިކައިވެނީގެ މައްސަލަތަކަށްވެސް ރޫހާނީ ފަރުވާއިން ހައްލު ހޯދައިދޭ މީހެކެވެ. އަތްބެލުމަކީ ރަމަލު ޖަގައިގެން ޣައިބުގައިވާ ކަންކަން ހޯދައި ފަރުވާ ދިނުމަށް ކިޔާ ނަމެކެވެ. މީގެ އިތުރުން އެކި އެކި ސިއްހީ މައްސަލަތަކަށް ފަރުވާ ހޯދުއިދޭކަމަށްވެސް އެ އިޝްތިހާރުގައި ބުނެފައިވެއެވެ.
މީގެ ކުރިން 2023 ގައި ވެސް މިފަދަ ކަމެއް ފެންމަތިވެ އެކަމުގައި ޝާމިލްވި މީހާ ވަނީ ހައްޔަރުކޮށް ޑީޕޯޓްކޮށްލާފައެވެ.
ރިއެކްޝަންސް
