ލިވަޕޫލާއި ޕޮއިންޓްގެ ފަރަގު ކުޑަކުރަން ފޮރެސްޓަށް ލިބުނު ފުރުޞަތު ގެއްލިއްޖެ, ބްރެންޓްފޯޑުން ސިޓީގެ އުއްމީދު ފެނަށް!
އިނގިރޭސި ޕްރިމިއަރ ލީގުގެ ތާވަލުގެ އެންމެ ކުރީގައި އޮތް ލިވަޕޫލްއާއި ނޮޓިންގްހަމް ފޮރެސްޓް ބައްދަލުކުރި މެޗު 1-1 ން އެއްވަރުވެއްޖެއެވެ. މިއާއެކު ނޮޓިންގހަމް ފޮރެސްޓަށް ޓައިޓްލް ހޯދުމުގެ ރޭހުގައި ލިވަޕޫލްއާ އޮތް ފަރަގު ކުޑަކުރަން އަންގާރަ ދުވަހު ލިބުނު ފުރުޞަތު ވަނީ ގެއްލިފައެވެ. މެޗުގެ އިތުރު ވަގުތުގައި ޖެހި ގޯލާއެކު މެންޗެސްޓަރ ސިޓީ އާއި ބްރެންޓްފޯޑް ބައްދަލުކުރި މެޗު ނިމުނީވެސް 2-2 ން އެއްވަރުވެގެންނެވެ.
ލިވަޕޫލްއާއި ނޮޓިންގްހަމް ފޮރެސްޓް ބައްދަލުކުރި މެޗުގެ ލީޑު ނެގީވެސް ފޮރެސްޓުންނެވެ. މެޗުގެ އެންމެ 8 ވަނަ މިނިޓްގައި ފޮރެސްޓަށް ލީޑު ނަގައިދިނީ ކްރިސް ވުޑްސްއެވެ. މެޗުގެ ފުރަތަމަ ހާފު ނިމުނީވެސް ފޮރެސްޓް ކުރީގައި އޮވެގެންނެވެ.
ދެވަނަ ހާފުގެ 66 ވަނަ މިނިޓްގައި ލިވަޕޫލްއަށް ނަތީޖާ އެއްވަރުކޮށްދިނީ ޑިއޯގޯ ޖޮޓާއެވެ. ނަމަވެސް މެޗުން ފޮރެސްޓްގެ މައްޗަށް ކުރިހޯދުމުގައި ލިވަޕޫލްއަށްވަނީ ނާކާމިޔާބުވެފައެވެ.
މެޗަށްފަހު ލިވަޕޫލްގެ ކޯޗު އާނެ ސްލޮޓްވަނީ ކުޅުންތެރިން މެޗުގައި ކުރި މަސައްކަތަށް ތައުރީފުކޮށްފައެވެ. އޭނާ ބުނީ ޓީމުގެ ފަރާތުން މިއަށްވުރެ ބޮޑު އެއްޗަކަށް މިވަގުތު ނޭދޭކަމުގައެވެ.
ނަތީޖާއާއެކު ލިވަޕޫލް ތާވަލްގެ އެއްވަނައިގައި 6 ޕޮއިންޓްގެ ލީޑަކާއެކު މިހާރުވެސް އޮތީ އެންމެ ކައިރިން ވާދަކުރާ ގިނަ ޓީމްތަކަށްވުރެ އެއްމެޗު މަދުން ކުޅެގެންނެވެ. ނޮޓިންގްހަމް ފޮރެސްޓް 41 ޕޮއިންޓާއެކު މިވަގުތު ދެވަނައިގައި އޮތްނަމަވެސް ތިންވަނައިގައި އޮތް އާސެނަލް މިރޭ ޓޮޓްނަމް އާ ބައްދަކުރާ މެޗުން އެއްވަރުވި ނަމަވެސް ދެވަނަ މަޤާމް ގެއްލޭނެއެވެ.
ފަސްވަނަ ފަހަރަށް ލީގު ހޯދުމުގެ ރޭހުގައި ނިކުއިން މެންޗެސްޓަރ ސިޓީއަށް އަންގާރަ ދުވަހު އަނެއްކާވެސް ނުތަނަވަސްކަމަކާ ކުރިމަތިލާން ޖެހިފައެވެ. ދެ ގޯލްގެ ލީޑެއްގައި މޮޅުވާން ދަނިކޮށް ބްރެންޓްފޯޑުން ވަނީ ސިޓީގެ އުއްމީދުތައް ފުނޑުފުނޑުކޮށްލާފައެވެ.
މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ގޯލެއް ކާމިޔާބު ނުކުރެވިއެވެ. ނަމަވެސް މެޗުގެ 66 ވަނަ މިނިޓްގައި ކެވިން ޑިބްރޭނާ ތަނަވަސްކޮށްދިން ފުރުޞަތެއްގައި ފިލް ފޯޑެން ވަނީ ސިޓީއަށް ލީޑު ނަގައިދީފައެވެ. އޭގެ ދިހަ މިނިޓް ފަހުން ފޯޑެން އަނެއްކާވެސް ގޯލެއް ކާމިޔާބުކޮށް ސިޓީއަށް ލީޑު ފުޅާކޮށްދިނެވެ.
ބެރެންޓްފޯޑްގެ ފުރަތަމަ ގޯލް 78 ވަނަ މިނިޓްގައި ކާމިޔާބުކޮށްދިނީ ޔޮއާން ވިއްސާ އެވެ. ބްރެންޓްފޯޑަށް ނަތީޖާ އެއްވަރުކޮށްދިނީ މެޗުގެ ފުރިހަމަ ވަގުތި ނިމި, އިތުރުވަގުތުގެ ދެވަނަ މިނިޓްގައި ކެޕްޓަން ކްރިސްޓިއަން ނޯގާޑް އެވެ.
މެޗު ނިމެންދަނިކޮށް ބްރެންޓްފޯޑަށް ސިޓީގެ މައްޗަށް ކުރިހޯދާނެ ރަނގަޅު ފުރުޞަތެއްވެސް ލިބުނެވެ. ނަމަވެސް ވިއްސާ ތަނަވަސްކޮށްދިން ފުރުޞަތު އެމްބުއެމޯ ގޯލަކަށް ބަދަލުކޮށްލުމުގެ ކުރިން ނަތަން އަކޭ ވަނީ ބޯޅަ ސާފުކޮށްލާފައެވެ.
ފާއިތުވި ދެމަހެއްހާ ދުވަހު ގިނަ މެޗުތަކަކުން ބަލިވެ ތާވަލްގެ ފަހަތަށް ވެއްޓިފައިވާ ސިޓީ އެންމެ ފަހުން ކުޅުނު ދެ މެޗު ކާމިޔާބުކޮށް ތިންވަމަ މެޗު ކާމިޔާބު ކުރަން ބްރެންޓްފޯޑުން ފުރުޞަތެއް ނުދިނެވެ. އަދި ތާވަލްގެ ގަދަ ފަހަކަށް އަރަންވެސް ޖާގައެއް ނުދިނެވެ.
މި ނަތީޖާ އާއެކު ސިޓީ ތާވަލްގެ 6 ވަނައިގައި އޮތީ 21 މެޗުން 35 ޕޮއިންޓާއެކު އެވެ. އެއީ ތާވަލްގެ ކުރީގައި އޮތް ލިވަޕޫލަށްވުރެ 12 ޕޮއިންޓް މަދުކޮށެވެ. ތާވަލްގެ 10 ވަނައިގައި ބްރެންޓްފޯޑް އޮތީ 21 މެޗުން 28 ޕޮއިންޓް ހޯދައިގެންނެވެ.
އަންގާރަ ދުވަހު ވެސްޓްހެމް ޔުނައިޓަޑްއިން ފުލަމްގެ މައްޗަށް ކުރިހޯދި 3-2 ން ނެވެ. ޗެލްސީ އާއި ބާންމައުތު ބައްދަލުކުރި މެޗު ނިމުނީ 2-2 ން އެއްވަރުވެގެންނެވެ.
ރިއެކްޝަންސް
