އެއް އާއިލާއެއްގެ 40 މީހުން އެކުގައި އުމުރާއަށް ދިޔައީ އަމިއްލައަށް!
އެމީހުން ދިޔައީ ގްރޫޕެއްގެ ހަވާލުގައެއް ނޫން
އެއް އާއިލާއެއްގެ 40 މީހުން އެކުގައި އުމުރާގެ މައްކާއަށް ގޮސް އުމުރާގެ އަޅުކަން ފުރިހަމަ ކޮށްފިއެވެ.
އެއް އާއިލާއެއްގެ 40 މީހުން އެކުގައި އުމްރާގެ އަޅުކަން އަދާކުރަން ދިޔަކަން ސަމާލުކަމަށް އައީ ސައޫދީގައި ހުންނަ ރާއްޖޭގެ އެމްބަސީން އެއާއިލާގެ ފޮޓޯއަކާއެކު އެކަން ހިއްސާކުރުމުންނެވެ. އެއީ ދަތުރުގެ ތެރެއިން އެއާއިލާގެ މެމްބަރުން އެމްބަސީއަށް ޒިޔާރަތް ކުރުމުން ސަފީރު އަހުމަދު ސަރީރު ބައްދަލުކުރައްވާ ނެންގެވި ފޮޓޯއެކެވެ.
އެއާއިލާގެ މީހަކު ބުނީ އާއިލީ މެމްބަރުން އުމްރާގެ އަޅުކަން އަދާކުރަން ދިޔައީ އެއްވެސް ގްރޫޕެއްގެ ހަވާލުގައި ނޫންކަމަށެވެ. އެމީހުން ދިޔައީ އަމިއްލަ އަށް ކަމަށާއި, އެމީހުން ރާއްޖެއިން ދިޔައީ ރިޔާދު އަށް ކަމަށެވެ. އުމްރާގެ އަޅުކަން އަދާކުރަން މައްކާއަށް ދިޔައީ ރިޔާދުން ނެވެ. މިވަގުތު އެމީހުން ތިބީވެސް ރިޔާދު ގައެވެ.
ސައުދީ އެމްބަސީގައި އެއާއިލާގެ މީހަކު މަސައްކަތް ކުރާކަމަށް އެނގިފައި ވެއެވެ. ޓޫރިސްޓް ވިސާގައި އުމްރާގެ އަޅުކަން އަދާކުރުމަށް އަމިއްލައަށް ޒިޔާރަތްކުރި އާއިލީ މެމްބަރުންގެ ތެރޭގައި އެއްބަނޑު އެއްބަފާ މީހުންވެސް ގިނައެވެ. އުމުރުން ދޮށީ މީހުންނާއި, ކުޑަކުދިންވެސް އުމްރާގެ އަޅުކަން އަދާކުރަން ދިޔަ އެއާއިލާގެ މެމްބަރުންގެ ތެރޭގައި ހިމެނެއެވެ.
އާއިލާ މެމްބަރުން އެކުގައި އުމްރާގެ އަޅުކަން އަދާކުރަން އައުމަކީ މިހާރު ޢާއްމު ކަމެކެވެ. ބޮޑަތި އާއިލާތައް އެކުގައި އައުމާއި, ގްރޫޕެއްގެ އެހީއާ ނުލާ އަމިއްލައަށް އައިސް އުމްރާގެ އަޅުކަން ފުރިހަމަކުރާ ފަރާތްތަކުގެ އަދަދުވެސް މިހާރު ގިނައެވެ.
ރިއެކްޝަންސް
