އެފްޑީސީ ފްލެޓްތައް ކުއްޔަށް ދީފިނަމަ 50،000 ރުފިޔާއިން ޖޫރިމަނާ ކުރަނީ
ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ ފްލެޓްތައް ތިންވަނަ ފަރާތަކަށް ކުއްޔަށް ދީފިނަމަ، ފްލެޓްގެ ވެރިފަރާތް 50،000 ރުފިޔާއާ ހަމައަށް ޖޫރިމަނާ ކުރާނެ ކަމުގެ އިންޒާރު އެ ކޯޕަރޭޝަނުން ދީފިއެވެ.
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރާ އިޖުތިމާއީ ބޯހިޔާވަހިކަމުގެ އެއްވެސް ތަނެއް ކުއްޔަށް ދީގެން އަމިއްލަ މަންފާއެއް ހާސިލުކުރުމަކީ އެފްޑީސީއާއެކު ވެފައިވާ އެއްބަސްވުމާ ހިލާފު ކަމެކެވެ. މިކަމާ ގުޅޭގޮތުން އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ކުރެއްވި ސޯޝަލް މީޑިއާ ޕޯސްޓެއްގައި ވިދާޅުވީ، އެފްޑީސީގެ ފްލެޓްތަކަކީ ތިންވަނަ ފަރާތަކަށް ކުއްޔަށް ދެވޭނެ ތަންތަން ނޫން ކަމަށެވެ.
މި މައްސަލަ ފެންމަތިވެފައިވަނީ، އެފްޑީސީން ހުޅުމާލެ ދެވަނަ ފިޔަވަހިން ދޫކޮށްފައިވާ ތިން ކޮޓަރީގެ އެޕާޓްމެންޓެއް ބޮޑު އަގެއްގައި ކުއްޔަށް ދޭން އިއުލާންކޮށްފައިވާ ފޮޓޯތަކެއް ސޯޝަލް މީޑިއާގައި ދައުރުވުމާ ގުޅިގެންނެވެ. ހަމްދާން ވިދާޅުވި ގޮތުގައި، މިފަދަ އަމަލުތައް ކުރާ ފަރާތްތަކާމެދު ހަރުކަށި ފިޔަވަޅު އަޅާނެއެވެ. އެގޮތުން 50،000 ރުފިޔާއާ ހަމައަށް ޖޫރިމަނާ ކުރުމުގެ އިތުރުން، އެ ފަރާތަކާއެކު ވެފައިވާ ފްލެޓްގެ އެއްބަސްވުން އުވާލުމުގެ އިހުތިޔާރު ވެސް ކޯޕަރޭޝަނަށް ލިބިގެންވާ ކަމަށް އޭނާ ވިދާޅުވިއެވެ.
މެނޭޖިން ޑިރެކްޓަރު އިތުރަށް ފާހަގަކުރެއްވި ގޮތުގައި، ސަރުކާރުން އިޖުތިމާއީ ބޯހިޔާވަހިކަން ފޯރުކޮށްދެނީ އެކަމަށް އެންމެ ބޭނުންޖެހިފައިވާ ފަރާތްތަކަށެވެ. އެހެންކަމުން، އެ ތަންތަން ކުއްޔަށް ދީގެން ވިޔަފާރި އުސޫލުން މަންފާ ހޯދުމަކީ، ރައްޔިތުންނަށް ބޯހިޔާވަހިކަމުގެ ހައްގު ކަށަވަރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުރަމުންދާ މަސައްކަތްތަކަށް އެޅޭ ވަރަށް ބޮޑު ހުރަހެކެވެ.
މި ފްލެޓްތަކަކީ އާންމު ރައްޔިތުންގެ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަށް ދައުލަތުން ބޮޑު ހޭދައެއް ކޮށްގެން ބިނާކޮށްފައިވާ ތަންތަން ކަމަށްވާތީ، އެތަންތަނުގެ ބޭނުން އެންމެ ހައްގުވެރި ގޮތުގައި ހިފުމަށް އެފްޑީސީން ވަނީ އިލްތިމާސްކޮށްފައެވެ.
ރިއެކްޝަންސް
