އަޅުގަނޑު ބޭނުންވަނީ ރައްޔިތުން އެދޭ ތަރައްޤީ ފުވައްމުލައް ސިޓީއަށް ހޯދައިދޭން: އަލީ މަސީޙް

ފުވައްމުލައް ސިޓީ ރައްޔިތުން ބޭނުންވާ ފަދަ ފުރިހަމަ ތަރައްގީއެއް އެ ސިޓީއަށް ހޯދައިދިނުމަކީ އެންމެ ބޮޑު އަމާޒު ކަމަށް، ފުވައްމުލަކު ސިޓީގެ މޭޔަރު ކަމަށް ޕީއެންސީގެ ފަރާތުން ވާދަކުރައްވާ ކެންޑިޑޭޓް އަލީ މަސީހު ވިދާޅުވެއްޖެއެވެ. 

އަލީ މަސީހު މިހެން ވިދާޅުވީ "ސުކުން ޕްލަސް" އަށް ދެއްވި ހާއްސަ އިންޓަވިއުއެއްގައެވެ. އޭނާ ވިދާޅުވި ގޮތުގައި، ފުވައްމުލަކުގެ ރައްޔިތުންނަށް ދިމާވެފައިވާ ތަފާތު ގޮންޖެހުންތަކުން އަރައިގަނެ، ރައްޔިތުންގެ އުންމީދުތަކާ އެއްގޮތްވާ ފަދަ ތަރައްގީއެއް ސިޓީއަށް ގެނައުމަށް އޭނާ ހުންނެވީ ތައްޔާރަށެވެ. 

މި އިންޓަވިއުގައި މަސީހު އިތުރަށް ފާހަގަކުރެއްވި ގޮތުގައި، ސަރުކާރު ހިންގާ ޕާޓީ، ޕީއެންސީގެ ކެންޑިޑޭޓެއްގެ ގޮތުގައި އޭނާ ނުކުމެ ހުންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ތަރައްގީގެ ތަސައްވުރު ފުވައްމުލަކުގައި ހަގީގަތަކަށް ހަދައިދިނުމަށެވެ. އަދި ރައްޔިތުންގެ އަޑު އަހައިގެން، ސިޓީ ކައުންސިލް މެދުވެރިކޮށް އެދެވޭ ބަދަލުތަކެއް ގެނައުމަށް މަސައްކަތް ކުރައްވާނެ ކަމުގެ ޔަގީންކަން އޭނާ ދެއްވިއެވެ. 

ފުވައްމުލަކުގެ މޭޔަރުކަމަށް ވާދަކުރައްވާ މަސީހަކީ އެ ސިޓީގެ ތަރައްގީއަށް މީގެ ކުރިންވެސް ގިނަ މަސައްކަތްތަކެއް ކޮށްދެއްވާފައިވާ ބޭފުޅެއްކަން ފާހަގަކޮށްލެވެއެވެ. އޭނާގެ މައިގަނޑު އަމާޒަކީ ސަރުކާރާ ގުޅިގެން ފުވައްމުލަކަށް ބޭނުންވާ އަސާސީ އަދި އިޖުތިމާއީ ތަރައްގީގެ މަޝްރޫއުތައް ހަލުވިކަމާއެކު ކުރިއަށް ގެންދިއުމެވެ. 

އަލީ މަސީހަކީ ކޮބާ؟

އަލީ މަސީހަކީ ތައުލީމީ ގޮތުން މާސްޓާސް ޑިގްރީ ހާސިލްކުރައްވައިގެން ހުންނެވި، ތަޖުރިބާކާރު ބޭފުޅެކެވެ. އޭނާ ވަނީ ކައުންސިލް އިދާރާގައި 12 އަހަރު ދުވަހު މަސައްކަތް ކުރައްވައި، ފަތުރުވެރިކަމުގެ ދާއިރާގައި 11 އަހަރު އަދި ތައުލީމީ ދާއިރާގައި ކިޔަވައިދެއްވުމުގައި 10 އަހަރުގެ ހިދުމަތް ފޯރުކޮށްދެއްވާފައެވެ. މީގެ އިތުރުން، އިޖުތިމާއީ އެކި ހަރަކާތްތަކުގައި އަމަލީ ގޮތުން ބައިވެރިވެވަޑައިގަންނަވާ މަސީހަކީ، ރައްޔިތުންނާ ގާތް ގުޅުމެއް ބާއްވާ، ރަށުގެ ކުރިއެރުމަށް ފޮނި ހުވަފެންތަކެއް ދެކޭ ހީވާގީ ބޭފުޅެކެވެ.

ސިޔާސީ ދާއިރާއަށް ނުކުންނެވި ސަބަބަކީ ކޮބާ؟

މީގެ ކުރިން ބޭއްވުނު ރިޔާސީ އިންތިހާބާއި، މަޖިލިސް އިންތިހާބު އަދި ކައުންސިލް އިންތިހާބުތަކުގައި ފަހަތުގައި ހުރެ ސިޔާސީ މަސައްކަތްތައް ކުރެއްވި ނަމަވެސް، މިއީ މަސީހު ސިޔާސީ މައިދާނުގެ ކުރީ ސަފަށް ނުކުންނެވި ފުރަތަމަ ފަހަރެވެ. އޭނާ ވިދާޅުވި ގޮތުގައި މޭޔަރުކަމަށް ކުރިމަތިލާން ނިންމެވީ، ރަށުގެ ތަރައްގީއަށްޓަކައި ރައްޔިތުން ކުރާ އުންމީދުތައް ހަގީގަތަކަށް ހަދައިދީ، ރައްޔިތުންގެ އަޑު އެންމެ ގާތުން އެހުމަށް ގިނަ ބަޔަކު އެދެމުންދާތީއެވެ.

ސަރުކާރުގެ ކެންޑިޑޭޓަކަށް ވޯޓު ދޭންވީ ކީއްވެ؟

މަސީހު ގަބޫލުކުރައްވާ ގޮތުގައި ރައްޔިތުންނަށް އެންމެ ބޮޑު މަންފާއެއް ހޯދައިދެވޭނީ ސަރުކާރާ ގުޅިގެން މަސައްކަތް ކުރާނެ ކެންޑިޑޭޓުން ހޮވައިގެންނެވެ. ސަރުކާރުގެ ބާކީ އޮތް ތިން އަހަރު ދުވަހުގެ ތެރޭގައި ފުވައްމުލަކަށް ބޭނުންވާ ތަރައްގީގެ މަޝްރޫއުތައް ރާވައި، ބަޖެޓު ހަމަޖައްސައި، މަސައްކަތްތައް ހަލުވިކަމާއެކު ކުރިއަށް ގެންދެވޭނީ ސަރުކާރާ ސީދާ މުއާމަލާތް ކުރެވޭނެ ބޭފުޅަކު ހޮވިގެންނެވެ. އެހެންކަމުން، ރަށުގެ މުސްތަގުބަލަށްޓަކައި ސަރުކާރުގެ ކެންޑިޑޭޓުންނަށް ވޯޓު ދެއްވުމަކީ މުހިންމު ކަމެއްކަން އޭނާ ފާހަގަކުރެއްވިއެވެ.

މަސީހު ކައުންސިލް އިންތިހާބުގައި ވާދަކުރައްވަނީ ކީއްވެ؟

ރަށުގައި އުލޭ ބޮޑުވި ފަރާތަކަށްވެފައި، ރައްޔިތުންގެ ކަންބޮޑުވުންތަކާއި ރަށަށް ބޭނުންވެފައިވާ ކަންކަން މަސީހަށް ވަރަށް ގާތުން އެނގެއެވެ. ބަނދަރުގައި ފެރީ ޓާމިނަލެއް ނެތުމާއި، ތޫނޑު ސަރަހައްދުގައި ވިޒިޓާ ސެންޓަރެއް ބޭނުންވުމާއި، ކޮޑަ ކިޅި ސަރަހައްދު ތަރައްގީކުރުން ފަދަ ގިނަ ކަންތައްތަކެއް އޭނާ ފާހަގަކުރެއްވިއެވެ. އަދި ރަށުގެ ދަނޑުބިންތަކުގެ ހާލަތު ރަނގަޅުކޮށް، ތަރައްގީކޮށްފައިވާ ތަންތަން ވީރާނާވިޔަނުދީ ބެލެހެއްޓުމަކީ އޭނާގެ މުހިންމު އަމާޒެކެވެ. މިކަންކަމަށް އަވަސް ހައްލެއް ހޯދައިދީ، ރައްޔިތުން އެދޭ ފަދަ ސިޓީއަކަށް ފުވައްމުލައް ހެދުމަކީ އޭނާ ކުރިމަތިލެއްވި މައިގަނޑު ސަބަބެވެ.

މަސީހަށް ވޯޓު ދޭންވީ ސަބަބުތަކަކީ ކޮބާ؟

މަސީހު އަންނަނީ ފުވައްމުލަކުގެ ކުރިއެރުމަށްޓަކައި ވަށާޖެހޭ މާސްޓާ ޕްލޭނަކާއެކުގައެވެ. އޭނާގެ އަމާޒަކީ:

- ޒުވާނުންނަށް ވަޒީފާގެ ފުރުސަތުތައް އިތުރުކުރުން.
- ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުން.
- ސިއްހީ ދާއިރާ ތަރައްގީކޮށް، ޓާޝަރީ ފެންވަރުގެ ހޮސްޕިޓަލަކުން ހިދުމަތް ދިނުމާއި، ސްޕެޝަލިސްޓު ޑޮކްޓަރުންގެ ހިދުމަތް ގާއިމްކުރުން.
- އިގްތިސާދީ ގޮތުން ފަތުރުވެރިކަމާއި، ދަނޑުވެރިކަމާއި، މަސްވެރިކަން ފުޅާކުރުން.
- ޓޫރިޒަމް މާސްޓާ ޕްލޭނެއްގެ ދަށުން ފަތުރުވެރިންގެ އަދަދު ދެގުނަ ކުރުން.

މިހާރުވެސް ކައުންސިލްގެ އިދާރީ ދާއިރާގައި މަސައްކަތް ކުރައްވަމުން ގެންދަވާ މަސީހު ވިދާޅުވީ، އޭނާ ހޮވިއްޖެނަމަ ކައުންސިލްގެ ނިންމުންތައް ނިންމާނީ ރައްޔިތުންގެ މަޝްވަރާއާއެކު ކަމަށެވެ. ކޮންމެ މަހަކު އެއްފަހަރު ރައްޔިތުންނާ ބައްދަލުކޮށް، ރަށުގެ މަޝްރޫއުތަކުގައި ރައްޔިތުންގެ ހިޔާލު ހޯދައި، އަޑުއަހާނެ ކަމުގެ ޔަގީންކަން އޭނާ ދެއްވިއެވެ.

މަސީހު ރައްޔިތުންނަށް ދޭން ބޭނުންވާ މެސެޖަކީ ކޮބަ؟ 

މަސީހުގެ މެސެޖަކީ އޭނާއަށް އިތުބާރު ކުރެއްވުމަށެވެ. ރައްޔިތުން އެދޭ ބަދަލާއި ތަރައްގީ ހޯދައިދީ، ފުވައްމުލަކަކީ ރާއްޖޭގެ އެންމެ ވަރުގަދަ އިގްތިސާދީ ހަބަށް ހަދައި، އެންމެން ދިރިއުޅެން ބޭނުންވާ ފަދަ ހިތްފަސޭހަ ސިޓީއަކަށް ހަދައިދޭނެ ކަމަށް މަސީހު ވައުދުވެވަޑައިގެންނެވިއެވެ.