ޕީއެންސީގެ ހެންވޭރު އުތުރު ޖަގަހަ ފަސްޓް ލޭޑީ ހުޅުއްވައިދެއްވައިފި

ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ތައްޔާރުވުމުގެ ގޮތުން، ޕީއެންސީގެ ހެންވޭރު އުތުރު ދާއިރާގެ ކެމްޕޭން ޖަގަހަ ރޭ ރަސްމީކޮށް ހުޅުވައިފިއެވެ.

ހުސްނުހީނާ މަގުގައި ހުންނަ ގ. ހެޕީސައިޑްގައި ގާއިމުކޮށްފައިވާ މި ޖަގަހަ ހުޅުއްވައިދެއްވީ ރޭ މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން ފަސްޓް ލޭޑީ ސާޖިދާ މުޙައްމަދު އެވެ.

މި ޖަގަހަ ހުޅުއްވައިދެއްވުމުގެ ޙަފްލާގައި ފަސްޓް ލޭޑީގެ އަރިހުގައި ޕީއެންސީގެ ޕާލިމަންޓަރީ ގްރޫޕްގެ ލީޑަރު އަދި މިފަހަރުގެ އިންތިޚާބުގައި އެ ޕާޓީގެ ކެމްޕޭން މެނޭޖަރުގެ ޒިންމާ އުފުއްލަވާ އިބްރާހީމް ފަލާޙް ބައިވެރިވެވަޑައިގެންނެވިއެވެ. މީގެ އިތުރުން ޕީއެންސީގެ ލީޑަރޝިޕްގެ އިސް ބޭފުޅުންނާއި ދާއިރާގެ ގިނަ އަދަދެއްގެ ސަޕޯޓަރުން މި ރަސްމިއްޔާތުގައި ބައިވެރިވިއެވެ.

މި ރަސްމިއްޔާތުގައި ކޮންގްރެސް ޕާޓީގެ ފަރާތުން މާލޭ ސިޓީގެ މޭޔަރުކަމުގެ މަޤާމަށް ވާދަކުރައްވާ މޫސާ ޢަލީ ޖަލީލް އާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ރައީސާ ކަމަށް ވާދަކުރައްވާ އަލްއުސްތާޛާ އާޝިޔަތު އަލައިކާ އަދުނާން ބައިވެރިވެވަޑައިގެންނެވިއެވެ. އަދި ހެންވޭރު އުތުރު ދާއިރާގެ އެކި މަޤާމުތަކަށް ކުރިމަތިލައްވާފައިވާ ކެންޑިޑޭޓުން ވެސް މި ޙަފްލާގައި ބައިވެރިވެވަޑައިގަތެވެ.

މި ޖަގަހައަކީ ކުރިއަށް އޮތް އިންތިޚާބުތަކުގައި ޕީއެންސީން ހޯދަން ބޭނުންވާ ކާމިޔާބީއަށް ވާސިލުވުމަށްޓަކައި، ކެމްޕޭންގެ ހަރަކާތްތައް ރޭވުމާއި ދާއިރާގެ ރައްޔިތުންނާ ބައްދަލުކޮށް މަޢުލޫމާތު ބަދަލުކުރުމަށް ހުޅުވުނު މަރުކަޒެކެވެ. އިންތިޚާބަށް ތައްޔާރުވުމުގެ ގޮތުން ސަރުކާރު ހިންގާ ކޯލިޝަނުން ދަނީ މާލޭގެ އެކި ދާއިރާތަކުގައި މިފަދަ ޖަގަހަތައް ހުޅުވައި، ކެމްޕޭންގެ ފޯރި ގަދަކުރަމުންނެވެ.