ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން އެސްޓީއޯއިން ވިއްކާ ތެލުގެ އަގު ބޮޑުކޮށްފި
ދުނިޔޭގެ ބާޒާރުގައި ތެލުގެ އަގު އުފުލެމުންދިއުމާ ގުޅިގެން، ރާއްޖެއަށް އެންމެ ގިނައިން ތެޔޮ އެތެރެކުރާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގަށް ބަދަލު ގެނެސްފިއެވެ.
އެސްޓީއޯގެ ދަށުން ހިންގާ ފިއުލް ސަޕްލައި މޯލްޑިވްސް (އެފްއެސްއެމް) އިން ޕެޓްރޯލާއި ޑީސަލް ވިއްކާނެ އައު އަގުތައް އެ ކުންފުނިން މިހާރު ވަނީ އާންމުކޮށްފައެވެ. އެސްޓީއޯއިން ތެލުގެ އަގަށް މި ބަދަލު ގެނެސްފައިވަނީ، މެދުރިއިރުމަތީގައި ހިންގަމުންދާ ހަނގުރާމައާ ގުޅިގެން ބައިނަލްއަގުވާމީ ބާޒާރުގައި ތެލުގެ އަގު އިންތިހާއަށް އުފުލިފައިވާ ދަނޑިވަޅެއްގައެވެ.
އެސްޓީއޯއިން އާންމުކޮށްފައިވާ އައު އަގުތަކަށް ބަލާއިރު، މިއަދުން ފެށިގެން ޕެޓްރޯލް ލީޓަރެއް ވިއްކާނީ 16.01 ރުފިޔާއަށެވެ. މީގެ ކުރިން ޕެޓްރޯލް ލީޓަރެއް ވިއްކަމުން ދިޔައީ 13.50 ރުފިޔާއަށެވެ. މިއީ ކުރީގެ އަގާ އަޅާބަލާއިރު ލީޓަރަކުން 2.51 ރުފިޔާގެ އިތުރުވުމެކެވެ.
ޑީސެލްގެ އަގަށް ގެނައި ބަދަލާއެކު، މިއަދުން ފެށިގެން ޑީސެލް ލީޓަރެއް ވިއްކާނީ 17.54 ރުފިޔާއަށެވެ. މީގެ ކުރިން ޑީސެލް ލީޓަރެއް 13.92 ރުފިޔާއަށް ވިއްކި ނަމަވެސް، މި ގެނެވުނު ބަދަލާއެކު ލީޓަރަކުން 3.62 ރުފިޔާ ވަނީ ބޮޑުވެފައެވެ.
ރިއެކްޝަންސް
