އިންތިޚާބާ ގުޅިގެން އެމްޑީޕީން ކޯޓަށް ހުށަހެޅި މައްސަލަ ކާމިޔާބު ނުކުރެވޭނެ: މެންބަރުު އިއްބެ

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާއި މެދު ރައްޔިތުންގެ ހިޔާލު ހޯދުމަށް ބާއްވާ ފެންނަ ނުފެންނަ ވޯޓު (ރެފަރެންޑަމް) ހުއްޓުވުމަށް އެމްޑީޕީން ސިވިލް ކޯޓަށް ހުށަހެޅި މައްސަލައިގައި ކާމިޔާބީއެއް ނުލިބޭނެ ކަމަށް ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސައިން (އިއްބެ) ވިދާޅުވެއްޖެއެވެ.

ސަންގުޓީވީއަށް ދެއްވި ހާއްސަ ބަސްދީގަތުމެއްގައި މެންބަރު އިއްބެ ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނެރުއްވާފައިވާ ގަރާރަކީ ގާނޫނީ ހަމަތަކުގެ މަތިން ނެރުއްވާފައިވާ ސައްހަ ގަރާރެއް ކަމަށެވެ. އަދި ގާނޫނުއަސާސީއަށް ގެނައި ބަދަލުތަކަކީ ވެސް ގާނޫނީ އިޖުރާއަތްތަކާ އެއްގޮތަށް ކުރިއަށް ގެންގޮސްފައިވާ ކަންކަން ކަމަށްވާތީ، ކޯޓު މަރުހަލާގެ ތެރެއިން އެމްޑީޕީއަށް މިކަމުގައި ކާމިޔާބީއެއް ލިބޭނެ ކަމަށް ގަބޫލުނުކުރައްވާ ކަމަށެވެ. 

"މި ނިންމުމުގެ ބާރު އޮތީ ސީދާ ރައްޔިތުންގެ އަތްމަތީގައި. އޭޕްރިލް 4 ވަނަ ދުވަހު ނަގާ ފެންނަ ނުފެންނަ ވޯޓުން ރައްޔިތުން ގޮތެއް ނިންމުމުން މިކަން ކުރިއަށްދާނީ. މިފަދަ މުހިންމު ބޮޑެތި ނިންމުންތައް ނިންމޭނީ ރައްޔިތުންގެ ގާތަށް ގޮސްގެން،" މެންބަރު އިއްބެ ވިދާޅުވިއެވެ.

މީގެ އިތުުރުން މެންބަރު އިއްބެ ވިދާޅުވީ، ޤާނޫނުއަސާސީއާ އެއްގޮތްވާ ގޮތުގެ މަތިން، ރައްޔިތުންގެ މަޖިލީހުގެ ބޮޑު އަޣުލަބިއްޔަތަކުން އެ ބިލު ފާސްވެފައިވާއިރު، މި ނިންމުން ނިންމުމުގައި ރައްޔިތުންގެ ފެންނަ ނުފެންނަ ވޯޓަކަށް ނުގޮސް ވެސް ކުރިއަށް ދިއުމުގެ ފުރުސަތު އޮތް ކަމަށެވެ. އެހެންނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އިސްކަންދެއްވީ މިފަދަ ބޮޑެތި ނިންމުންތަކުގައި ރައްޔިތުންގެ ބަސް ހޯއްދެވުމަށެވެ. އެގޮތުން ޤާނޫނުއަސާސީއަށް އިސްލާހު ގެނެސް، ރައްޔިތުންނަށް ބާރުވެރިކަން ދިނުމަށްފަހު މި އިސްލާހު ވަނީ ފާސްކުރެވިފައި ކަމަށް އިއްބެ ވިދާޅުވިއެވެ. 

މި މައްސަލައިގައި އެމްޑީޕީން ސިވިލް ކޯޓަށް ޖުޑީޝަލް ރިވިއުގެ ދައުވާއެއް ހުށަހަޅާފައިވާއިރު، މައްސަލައިގައި ވަކި ގޮތެއް ނިމެންދެން ރެފަރެންޑަމް ވޯޓު މަޑުޖައްސާލުމުގެ ވަގުތީ އަމުރަކަށް ވެސް ވަނީ އެދިފައެވެ. އެމްޑީޕީގެ މައިގަނޑު ކަންބޮޑުވުމަކީ ރައީސް ނެރުއްވި ގަރާރާއި އިންތިޚާބުތައް އެއްކޮށްލުމަށް ގާނޫނަށް ގެނައި އިސްލާހަކީ ގާނޫނުއަސާސީއާ ފުށުއަރާ ކަންކަން ކަމަށް ބުނާ ބުނުމެވެ.

މީގެ އިތުރުން، ލޯކަލް ކައުންސިލް އިންތިޚާބާ ދިމާކޮށް މި ވޯޓު ނަގަން ނިންމުމުން، ކެމްޕެއިން ކުރުމުގެ ހައްގާއި، މައުލޫމާތު އޮޅުންފިލުވުމުގެ މިނިވަންކަމުގެ އިތުރުން ވޯޓު ދިނުމުގެ ހައްގަށް އުނިކަން އަންނާނެ ކަމަށް އެމްޑީޕީން ވަނީ ތުހުމަތުކޮށްފައެވެ. އެހެންނަމަވެސް، ސަރުކާރު ކޯލިޝަނުގެ މެންބަރުން ބާރުއަޅުއްވަނީ މިއީ ދައުލަތުގެ ހަރަދުތައް ކުޑަކޮށް، ވެރިކަން ހިންގުމުގެ ނިޒާމު ހަރުދަނާކުރުމަށްޓަކައި ރައްޔިތުންގެ މަންފާއަށް ނިންމާފައިވާ ނިންމުމެއް ކަމަށެވެ.

އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބާ އެކު، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާ މެދު ރައްޔިތުންގެ ފެންނަ ނުފެންނަ ވޯޓެއް ނެގުމަށް ވެސް މިހާރު ވަނީ ނިންމާފައެވެ.

މިކަމާ ގުޅިގެން ޕީއެންސީގެ އިސްވެރިން ވިދާޅުވަމުން ގެންދަވަނީ، މިއީ ކުރިމަގުގައި ރައްޔިތުންނަށް ސީދާ ގޮތުން ގިނަ ފައިދާތަކެއް ކުރާނެ ކަމަކަށް ވާތީ، ރައްޔިތުންގެ ބޮޑު އަޣުލަބިއްޔަތަކުން މި ވޯޓު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.