ގްރޭޓަރ މާލެ ފައިނޭންޝަލް ޑިސްޓްރިކްޓް" ގެ ނަން "މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް" އަށް ބަދަލުކުރައްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސަރުކާރުގެ ސައްތައިންސައްތަ ހިއްސާވާ ކުންފުންޏެއް ކަމަށްވާ "ގްރޭޓަރ މާލެ ފައިނޭންޝަލް ޑިސްޓްރިކްޓް ލިމިޓެޑް" ގެ ނަން، "މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް ލިމިޓެޑް" ގެ ނަމަށް މިއަދު ބަދަލުކުރައްވައިފިއެވެ.
ރައީސުލްޖުމްހޫރިއްޔާ މި ނަން ބަދަލުކުރެއްވިކަން އިޢުލާންކުރައްވާފައިވަނީ މިއަދު ޝާއިޢުކުރެއްވި ނަންބަރު 2026/6 ޤަރާރުންނެވެ. މި ބަދަލު ގެންނަން ނިންމެވީ ކުންފުނީގެ މަގުސަދުތަކަށް ގެނެވުނު ބަދަލުތަކާ ގުޅިގެން، ކުންފުނީގެ ބޯޑުން އެގޮތަށް ހުށަހެޅުމާ ގުޅިގެންނެވެ.
"ގްރޭޓަރ މާލެ ފައިނޭންޝަލް ޑިސްޓްރިކްޓް ލިމިޓެޑް" އަކީ ރާއްޖެ ބައިނަލްއަގުވާމީ މާލީ މަރުކަޒަކަށް ހަދައި، އިގްތިސާދު ކުރިއެރުވުމަށް 2025 ވަނަ އަހަރު އުފެއްދި ކުންފުންޏެކެވެ. މި ކުންފުނީގެ މައިގަނޑު މަގުސަދަކީ ޑިޖިޓަލް ފައިނޭންސާއި، ރިއަލް އެސްޓޭޓާއި، ފައިނޭންޝަލް ޓޫރިޒަމް އަދި ބޭންކިންގ ފަދަ މާލީ ޚިދުމަތްތައް ރާއްޖޭގައި ތަރައްގީކޮށް ތަންފީޒުކުރުމެވެ.
ރައީސުލްޖުމްހޫރިއްޔާގެ ޤަރާރުގައި ބަޔާންކުރައްވާފައިވާ ގޮތުގައި، މި ބަދަލާއެކު ކުންފުނީގެ މަގުސަދުތަކުގެ ތެރޭގައި ދިވެހިރާއްޖޭގެ އުފެއްދުންތެރިކަން އިތުރުކުރުމާއި، ޑިޖިޓަލް ބޭންކިންގ އާއި ފައިނޭންޝަލް ޓޫރިޒަމް ފަދަ ދާއިރާތަކުން ރާއްޖެއަކީ ބައިނަލްއަގުވާމީ މަރުކަޒަކަށް ހެދުން ހިމެނެއެވެ.
މީގެ އިތުރުން، ދިވެހިރާއްޖޭގެ ސަރަހައްދުގެ އިސްތިރާޖީ މަންފާ އެންމެ އެދެވޭ ގޮތެއްގައި ހާސިލުކުރުމަށްޓަކައި "ތިލަދުންމަތީ އުތުރުބުރީ އިހަވަންދިއްޕޮޅު" (Ihavandhippolhu) ތަރައްޤީކުރުމުގެ ބިޔަ މަޝްރޫޢު ވިލަރެސްކޮށް ތަންފީޒުކުރުމަކީވެސް މި ކުންފުނީގެ މުހިންމު ޒިންމާއެކެވެ. ރައީސްގެ ޤަރާރުގައި ވިދާޅުވެފައިވަނީ، މި މަސައްކަތްތައް މެދުކެނޑުމެއްނެތި ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި، ކުންފުނީގެ ނަން މިގޮތަށް ބަދަލުކުރުމަކީ އިސްތިރާޖީ ގޮތުން ނުހަނު މުހިންމު ކަމެއް ކަމަށެވެ.
މި އައު ބަދަލާއެކު "މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް ލިމިޓެޑް" ވެގެންދާނީ ރާއްޖޭގެ އިގްތިސާދީ ތަޞައްވުރު ހަގީގަތަކަށް ހެދުމަށް ސީދާ މަސައްކަތްކުރާނެ ޚާއްޞަ ކުންފުންޏަކަށެވެ.
ރިއެކްޝަންސް
