އަންނަ މާރިޗު މަހު ރާއްޖެއަށް ވާރޭވެހޭ މިންވަރު މަދުވާނެ: މެޓް އޮފީސް
ކުރިއަށް އޮތް މާރިޗު މަހަކީ ރާއްޖޭގެ ހުރިހާ ސަރަޙައްދަކަށްވެސް އާންމުކޮށް ވާރޭވެހޭ މިންވަރަށްވުރެ މަދުން ވާރޭވެހޭނެ މަހެއް ކަމަށް މޫސުމާ ބެހޭ ޤައުމީ އިދާރާ (މެޓް އޮފީހުން) ލަފާކޮށްފިއެވެ.
މެޓް އޮފީހުން ހާމަކޮށްފައިވާ ގޮތުގައި، ވޭތުވެދިޔަ އަހަރުތަކާ އަޅާބަލާއިރު މިއަހަރުގެ މާރިޗު މަހު ރާއްޖޭގެ ހުރިހާ ހިސާބަކަށްވެސް ވާރޭވެހޭނެ ކަމަށް ބެލެވެނީ އެވްރެޖް މިންވަރަށްވުރެ މަދުންނެވެ. ވަކިވަކި ސަރަޙައްދުތަކަށް ބަލާއިރު، އުތުރުގެ އަތޮޅުތަކަށް ވާރޭވެހޭނެ ކަމަށް ލަފާކުރެވެނީ އާންމުކޮށް ވާރޭވެހޭ މިންވަރަށް ނުވަތަ އެއަށްވުރެ މަދުންނެވެ. ނަމަވެސް، މެދުރާއްޖެތެރެއާއި ދެކުނުގެ އަތޮޅުތަކަށް ވާރޭވެހޭނެ ކަމަށް ބެލެވެނީ އާންމުކޮށް ވާރޭވެހޭ މިންވަރަށްވުރެ ބޮޑުތަން މަދުން ކަމަށް އެ އިދާރާއިން ފާހަގަކުރެއެވެ.
ރާއްޖޭގައި އިރުވައި މޫސުން ދެމިގެންދަނީ ޖެނުއަރީ މަހުން ފެށިގެން މާރިޗު މަހުގެ ނިޔަލަށެވެ. އިރުވައި މޫސުމަކީ އާންމުކޮށް ހޫނުގަދަ ދުވަސްވަރަކަށް ވީނަމަވެސް، ކޮންމެވެސް ވަރަކަށް ރާއްޖޭގެ އެކި ސަރަޙައްދުތަކަށް ވާރޭވެހެއެވެ. އެހެންނަމަވެސް، ދުނިޔެއަށް އަންނަމުންދާ މޫސުމީ ބަދަލުތަކާ ގުޅިގެން ރާއްޖޭގެ މޫސުމަށްވެސް ބޮޑެތި ބަދަލުތަކެއް އަންނަމުންދާކަން މެޓް އޮފީހުން ފާހަގަކުރެއެވެ.
މޫސުމާ ބެހޭ އިދާރާގެ ރެކޯޑުތަކަށް ބަލާއިރު، ފާއިތުވި އަހަރުތަކުގެ މާރިޗު މަހު އެވްރެޖްކޮށް އެންމެ ގިނައިން ވާރޭވެހިފައިވަނީ ދެކުނުގެ އަތޮޅުތަކަށެވެ. އެގޮތުން އައްޑޫ ސިޓީ ގަމަށް އެވްރެޖްކޮށް 120.5 މިލިމީޓަރުގެ ވާރޭ ވެހޭއިރު، މާލެ ސަރަޙައްދަށް ވެހެނީ 48.6 މިލިމީޓަރުގެ ވާރޭއެވެ. އަދި އުތުރުގެ ރަށްތަކަށް އެވްރެޖްކޮށް ވެހެނީ 32.7 މިލިމީޓަރުގެ ވާރޭއެވެ. އެހެންނަމަވެސް، މިއަހަރުގެ މާރިޗު މަހު މި ނިސްބަތްތައް ދަށްވާނެ ކަމަށް ބެލެވެއެވެ.
ވާރޭވެހޭ މިންވަރު މަދުވުމުގެ އިތުރުން، އަންނަ މަހު ރާއްޖޭގެ ފިނިހޫނުމިނަށްވެސް ބަދަލުތަކެއް އަންނާނެ ކަމަށް މެޓް އޮފީހުން ލަފާކުރެއެވެ. އެގޮތުން މުޅި ރާއްޖޭގައިވެސް ފިނިހޫނުމިން އެންމެ މައްޗަށްދާ މިންވަރާއި އެންމެ ދަށަށްދާ މިންވަރު، އާންމު މިންވަރަށްވުރެ ކުޑަތަންކޮޅެއް މަތިވާނެ ކަމަށް ވަނީ ލަފާކޮށްފައެވެ. މިއީ ރާއްޖެއަށް މިހާރު ކުރިމަތިވަމުންދާ ހޫނު މޫސުމުގެ އަސަރު އިތުރަށް ގަދަވެގެންދާނެ ކަމުގެ ނިޝާނެއް ކަމަށް ބެލެވެއެވެ.
ރިއެކްޝަންސް
