ސުވާލު އުފެދުނު ވީއޭއާރުގެ ނިންމުމާއެކު ޗެލްސީއަށް މޮޅެއް
އިނގިރޭސި ޕްރިމިއަރ ލީގުގައި މިރޭ ޔާއޮ ޕެޑްރޯ ބޮލުންޖަހާ ފޮނުވާލި ގޯލާއި އެންޒޯ ފެނާންޑޭޒްގެ ޕެނަލްޓީ އަދި ވީޑިއޯ އެސިސްޓަންޓް ރެފްރީ (ވީއޭއާރު) ގެ ސުވާލު އުދެފުނު ނިންމުމާއެކު ޗެލްސީން 2-0 ން ފުލަމްގެ މައްޗަަށް ކާމިޔާބު ހޯދައިފިއެވެ.
މެޗުގެ 21 ވަނަ މިނިޓްގައި ފުލަމްގެ މެދުތެރެއަށްކުޅޭ ހޯޝުއާ ކިންގް ކާމިޔާބުކުރި ގޯލާއެކު ލީޑު ނެގުނީ ކަމަށް ފުލަމް ނިންމިއެެވެ. ނަމަވެސް ރެފްރީ ރޮބާޓް ޖޯންސްވަނީ ކުޅުންހުއްޓުވާ ވީއޭއާރުގެ ނިންމުމާއެކު ފުލަމްގެ ޑިފެންޑަރު ޓްރެވޯ ޝަލޯބާ ޗެލްސީގެ ރިޑްރީގޯ މުނިޒްއަށް ފައުލްކުރިކަމަށް ނިންމާ އެ ގޯލް ބަލައިނުގެންފައެވެ.
ނަމަވެސް ފެންނަ ފެނުމަށް އެއީ ފައުލަކަށް ވުރެ އާދައިގެ ކުޅުމުގެ ތެރޭގައި އާންމުކޮށް މުޑިއަރާކަހަލަ ކަމެއްކަމަށް ފުޓްބޯޅައިގެ އެނަލިސްޓުން ވަނީ ބުނެފައެވެ.
ރެފްރީގެ ނިންމުމާއެކު ފުލަމްގެ އުފާވެރިކަން ހިތިކަމަށްކަށް ބަދަލުވެފައި އޮށްވައި ޗެލްސީން ވަނީ ފުރަތަމަ ހާފުގެ އިތުރުވަގުތުގައި ގޯލެއް ކާމިޔާބުކޮށް ލީޑު ނަގާފައެވެެ. އެންޒޯ ފެނާންޑޭޒް ތަނަވަސްކޮށްދިން ފުރުޞަތުގައި ޗެލްސީގެ ފުރަތަމަ ގޯލް ކާމިޔާބުކުރީ ޕެޑްރޯ އެވެ.
ބައިނަލްއަގުވާމީ ބްރޭކަށް ދިއުމުގެ ކުރިން ޗެލްސީން މި ހޯދި މުހިއްމު ކާމިޔާބުގައި ދެވަނަ ގޯލް އެންޒޯގެ ޕެނަލްޓީ އިން ކާމިޔާބުކުރީ މެޗުގެ 56 ވަނަ މިނިޓްގައެވެ.
މެޗުގެ ފުރަތަމަ ހާފުގައި ޗެލްސީގެ އެންމެ ކުރިއަށް ކުޅޭ ލިއަމް ޑެލަޕްގެ ފައިގެ ފަލަމަސްގަނޑަށް އަނިޔާވެ ވަނީ ބަދަލުކޮށްފައެވެ.
ރިއެކްޝަންސް
