ހަށިގަނޑު ހާމަކޮށްގެން ކުރާ މަސައްކަތަކުން ލިބޭނެ ކާމިޔާބީއެއް, ރީތި ނަމެއް ނެތް- ރައީސް
ރައީސް މިފަދައިން ވިދާޅުވީ ރީތީގެ މުބާރާތެއްގައި ވާދަކުރުން ކުށްވެރި ކުރި މައްސަލައަކާ ގުޅިގެން ހިޔާލުތަފާތުވުން އުފެދިފައި ވަނިކޮށް
ހަށިގަނޑު ހާމަކޮށްގެން ކުރާ މަސައްކަތަކުން ލިބޭނެ ކާމިޔާބީއެއް, އަދި ރީތި ނަމެއްވެސް ނެތްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިފަދައިން ވިދާޅުވެފައި މިވަނީ ދިވެހި ޒުވާނަކު ރީތީގެ މުބާރާތެއްގައި ބައިވެރިވާން ނިންމުމުން އެކަން ކުށްވެރިކޮށް, ސަރުކާރުން ބަޔާނެއް ނެރުމާއެކު ބޮޑީބިލްޑިންގ މުބާރާތްތައް ބޭއްވުން މައްސަލައަކަށް ނުވަނީ ކީއްވެތޯ ސުވާލު އުފައްދާ ފާޑުކިޔަމުން ދަނިކޮށެވެ. އިއްޔެ މުޅި ސޯޝަލް މީޑިޔާގައި އޮތް މައިގަނޑު ވާހަކައަކީ ރީތީގެ މުބާރާތެއްގައި ބައިވެރިވުން ގޯސްވެފައި, ފިރިހެނުންގެ ހަށިގަނޑު ހާމަކޮށް ބޮޑީބިލްޑިންގ މުބާރާތުގައި ބައިވެރިވުން މައްސަލައަކަށް ނުވޭތޯއެވެ.
އެވާހަކަތައް ވަރަށް ބޮޑަށް ވައިރަލްވަމުން ދަނިކޮށް ރައީސުލްޖުމްހޫރިއްޔާ ރޭ ކުރެއްވި ޕޯސްޓެއްގައި ވިދާޅުވީ ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ޤައުމަށް ލިބޭނެ ޙަޤީޤީ ރީތިނަމެއް، އުފަލެއް، ކާމިޔާބީއެއް ނެތް ކަމަށެވެ.
އޭގެފަހުން ރައީސް ވަނީ އިސްރާ ސޫރަތުގެ އާޔަތެއް މާނައާއެކު ހިއްސާ ކުރައްވާފައެވެ. އެއާޔަތުގެ މާނައަކީ
"އަދި ކަލޭގެފާނު ވިދާޅުވާށެވެ! ޙައްޤު ތެދުގޮތް އަތުވެއްޖެއެވެ. އަދި ބާޠިލު ގޮތް ނެތި ފިލައިހިނގައްޖެއެވެ. ހަމަކަށަވަރުން، ބާޠިލަކީ، ނެތިވެ ފިލައިދަނިވި އެއްޗެއްކަމުގައިވިއެވެ."
ރީތީގެ މުބާރާތުގައި ދިވެހި ޒުވާނަކު ބައިވެރިވަނީ ސަރުކާރުގެ ބއިވެރިވުމެއް އޮވެގެން, އަދި ރާއްޖެ ތަމްސީލުކުރަން ނޫންކަން ބަޔާންކަން އިއްޔެ ބަޔާނެއް ނެރުނީ ޒުވާނުންނާ ބެހޭ ވުޒާރާއިންނެވެ. އެކަން ކުށްވެރިކޮށް, އެމުބާރާތުގައި ބައިވެރިވުން ހުއްޓާލުމަށްވެސް ބަޔާނުގައި ވަނީ ގޮވާލާފައެވެ.
ރިއެކްޝަންސް
