ޗައިނާ ސަރުކާރުގެ އެހީގައި ވިލިމާލޭގައި އަޅަނީ 112 އެނދުގެ ހޮސްޕިޓަލެއް
ދެން އޮތީ ޑީޓެއިލް ޑިޒައިން މަރުހަލާ
ޗައިނާ ސަރުކާރުގެ އެހީގައި ވިލިމާލޭގައި އަޅަނީ 112 އެނދުގެ ހޮސްޕިޓަލެއް ކަމަށް މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ބުނެފިއެވެ.
ހޮޕިސްޓަލް އެޅުމަށް ކުރަންޖެހޭ މަސައްކަތްތަކުގެ ތެރެއިން ފީސިބިލިޓީ މަރުހަލާ މިހާރު ވަނީ ނިންމާފައެވެ. އެމަރުހަލާއަށްފަހު މިއަދު ވަނީ ޑީޓެއިލް ޑިޒައިން މަރުހަލާ ފެށުމުގެ އެއްބަސްވުމުގައި ޗައިނާ ސަރުކާރާއެކު ސޮއިކުރައްވާފައެވެ. އެއްބަސްވުމުގައި ގެދޮރުވެރިކަމާއި ބިނާރާ ބެހޭ ވުޒާރާގެ ފަރާތުން ސޮއި ކުރެއްވީ މިނިސްޓަރ، ޑރ. ޢަބްދުﷲ މުއްޠަލިބްއެވެ. އަދި، ޗައިނާ ސަރުކާރުގެ ފަރާތުން ސޮއި ކުރެއްވީ ޗައިނާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު ކޮންގް ޒިއަންހުއާ އެވެ.
ވިލިމާލޭގައި އިމާރާތްކުރާ ހޮސްޕިޓަލަށް ދީފައިވާ ނަމަކީ "ވިލިމާލެ ޗައިނާ މޯލްޑިވްސް ފްރެންޑްޝިޕް ހޮސްޕިޓަލް" އެވެ.
މިއީ ރައީސުލްޖުމްހޫރިއްޔާ ޗައިނާއަށް ކުރެއްވި ރަސްމީ ދަތުރުފުޅުގެ ތެރެއިން ހަމަޖެހި އިއުލާނުކުރެއްވި މަޝްރޫއެކެވެ.
ރިއެކްޝަންސް
