ހަފްތާގެ ކޮންމެ ދުވަހަކު އާރުޓީއެލްގެ ފެރީގެ ޚިދުމަތް ހުރިހާ ރޫޓަކަށް ބޭނުމެއް ނުވޭ- މިނިސްޓަރ
ހަފްތާގެ ކޮންމެ ދުވަހަކު އާރުޓީއެލްގެ ފެރީގެ ޚިދުމަތް ހުރިހާ ރޫޓަކަށް ބޭނުން ނުވާކަމަށް ޓްރާންސްޕޯރޓް މިނިސްޓަރ މުޙައްމަދު އަމީން ވިދާޅުވެއްޖެއެވެ. ބައެއް އަތޮޅުތަކުގެ ރޫޓްތަކުގައި ރޯދަމަހުން ފެށިގެން ހުކުރު ދުވަހު ދަތުރުނުކުރާކަން ފާހަގަކުރައްވާ ރައްޔިތުންގެ މަޖިލިހުގެ މެމްބަރަކު ތަޅުމުގައި މިއަދު ކުރެއްވި ސުވާލަކަށް ޖަވާބުދެއްވަމުން މިނިސްޓަރ އަމީން ވިދާޅުވީ ހަފްތާއަކު 7 ދުވަހު ހުރިހާ އަތޮޅެއްގެ, ހުރިހާ ރޫޓެއްގައި ދަތުރުކުރަން ބޭނުން ނުވާކަން ޑޭޓާއިން އިނގޭ ކަމަށެވެ/
" ނަމަވެސް އެރޫޓެއްގައި ބޭނުންކުރައްވާ ރައްޔިތުން ބޭނުންވެވަޑައިގެން މިއަދުވެސް އެދިއްޖެނަމަ އެދެމުންދާ ރޫޓްތައް އަޅުގަނޑުމެން ރީސްޓާޓް ކުރަމުން މިގެންދަނީ. ޑޭޓާއަށް ބަލާފަ ހުކުރު ދުވަހު ބައެއް ރޫޓްތަކުގައި ހަމަ އެއްގޮތަކަށްވެސް ދަތުރެއް ނުކުރޭ." މިނިސްޓަރ ވިދާޅުވިއެވެ.
އާރުޓީއެލް ޚިދުމަތަކީ ދައުލަތުން އެމްޓީސީސީއަށް ވަރަށްބޮޑަށް ސަބްސަޑައިޒް ކުރެވިގެން ދޭ ޚިދުމަތެއްކަން ފާހަގަކުރައްވާ މިނިސްޓަރ ވިދާޅުވީ ބަދަލުތައް ގެންނަނީ ސަބްސިޑައިޒް ކުރަންޖެހޭ އަދަދު ކުޑަކުރުމަށް ކަމަށެވެ. އެޚިދުމަތަށް މިހާރުވެސް ދައުލަތުން ގާތްގަނޑަކަށް %80 މުޅި އޮޕަރޭޝަނަށް ސަބްސިޑައިޒް ކުރަންޖެހޭ ކަމަށް ވިދާޅުވިއެވެ. ވަޒީރު ވިދާޅުވީ ރިކަވަރީއަށް ލިބެނީ އެންމެ %20 ކަމަށެވެ.
ސަރުކާރުގެ އަމާޒަކީ މިއަހަރުގެ ނިޔަލަށް ރާއްޖޭގެ ހުރިހާ އަތޮޅެއްގައި އާރުޓީއެލްގެ ޚިދުމަތް ފެށުމެވެ. ކުރިއަށް އޮތީ ރ. އަތޮޅާއި ބ.އަތޮޅުގައި ޚިދުމަތް ފެށުމެވެ.
ރިއެކްޝަންސް
