ގާނޫނީ އިމުގެ ތެރެއިން ހައްލު ހޯދުމަށް އެޗްއާރްސީއެމް އިން އިލްތިމާސް ކުރައްވައިފި
ގާނޫނީ އިމުގެ ތެރެއިން މައްސަލަތަކުގެ ހައްލު ހޯދުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން އިލްތިމާސް ކުރައްވައިފިއެވެ.
އެ އިދާރާއިން މިފަދައިން އިލްތިމާސްކުރައްވާފައި މިވަނީ ކ. މާފުށީގައި ވައްކަމުގެ ތުހުމަތުވި މީހަކަށް އަނިޔާކުރާ މަންޒަރު ދައްކުވައިދޭ ވީޑިއޯތަކެއް އާއްމުވުމާއި ގުޅިގެންނެވެ.
އެޗްއާރްސީއެމްއިން އެދިފައިވަނީ މިފަދަ ލާއިންސާނީ އަމަލުތައް ދައްކުވައިދޭ ވީޑިއޯތައް އާއްމު ނުކުރުމަށާއި، އެފަދަ އަމަލުތަކަށް ހިތްވަރުދޭ ކަންކަން ނުކުރުމަށެވެ. އަދި މިފަދަ ދަށުދަރަޖައިގެ އަމަލުތައް ނުހިންގުމަށްވެސް އެޗްއާރުސީއެމުން އިލްތިމާސްކުރައްވާފައި ވެއެވެ.
"މިފަދަ ހާލަތްތަކުގައި އެ މައްސަލަތައް ހަމަޖެހިފައިވާ އުސޫލުގެ ތެރެއިން، ކަމާބެހޭ ފަރާތްތަކަށް ހުށަހެޅުން އެދެމެވެ. އަދި މިފަދަ މައްސަލަތައް ކަމާގުޅުންހުރި އިދާރާތަކުން ވެސް ވީހާ އަވަހަށް ތަހުގީގުކޮށް ފިޔަވަޅު އެޅުމަށް ގޮވާލަމެވެ." އެޗްއާރުސީއެމުން އިލްތިމާސްކުރެއްވިއެވެ.
އެއްވެސް ފަރުދަކު އަނެކާގެ އިންސާނީ ހައްގާއި ކަރާމާތަށް އަރައިނުގަތުމަށާއި، އެކިބާވަތުގެ މައްސަލަތަކުގައި ސުލްހަމަސަލަސްކަން އިސްކުރުމަށް ވެސް އެޗްއާރްސީއެމްއިން އިލްތިމާސްކުރައްވާފައި ވެއެވެ.
ރިއެކްޝަންސް
