ކައުންސިލް އިދާރާ އަޅަން ފުރަތަމަ ބިންގާ އެޅި ރަށަކަށް ރ.މަޑުއްވަރި
މިސަރުކާރުން ކުރިއަށްގެންދާ ރަށްރަށުގެ ކައުންސިލް އިދާރާތައް އެޅުމުގެ މަޝްރޫއުގެ ދަށުން ބިންގާ އެޅި ފުރަތަމަ ރަށަކަށް ރ.މަޑުއްވަރި ވެއްޖެއެވެ. މަޑުވަރީގައި އަލަށް އިމާރާތްކުރާ ކައުންސިލް އިދާރާގެ ބިންގާ އެޅީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ރ.އަތޮޅުގެ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން މިއަދު މަޑުއްވަރިއަށް ވަޑައިގަތުމުން ބޭއްވި ރަސްމިއްޔާތުގައެވެ.
މަޑުއްވަރީ ކައުންސިލް އިދާރާގެ ބިންގާ އަޅުއްވައިދެއްވީ ލޯކަލް ކައުންސިލް ތަކާއި ސިޓީތަކާވެހޭ ވުޒާރާގެ މިނިސްޓަރ އާދަމް ޝަރީފް އުމަރެވެ. އެމަނިކުފާނަކީ ރައްޔިތުންގެ މަޖިލިހުގެ މަޑުއްވަރީ ދާއިރާގެ ކުރީގެ މެމްބަރުވެސް މެއެވެ. މަޑުއްވަރި އަކީ ދެ ފަންގިފިލާއަށް ކައުންސިލް އިދާރާ އިމާރާތް ކުރާ ރަށްތަކުގެ ތެރެއިން ރަށެކެވެ.
މަޑުއްވަރީ ކައުންސިލް އިދާރާގެ މަސައްކަތް ކުރާނީ ހެކްސްޓާ ގްލޯބަލް އެވެ. މަޑުއްވަރި ހިމެނެނީ މެލޭޝިޔާ ކުންފުންޏާ ހަވާލުކުރި 55 ކައުންސިލް އިދާރާގެ ލިސްޓްގައެވެ. އެލިސްޓްގައި ހިމެނޭ އިދާރާތަކުގެ ތެރެއިން ދެ ފަންގިފިލާއަށް އިމާރާތް ކުރަނީ 27 އިމާރާތެކެވެ. ދެ ފަންގިފިލައަށް އިމާރާތްކުރާ އިދާރާތައް މަސައްކަތް ފަށާތާ 18 މަސް ދުވަހުގެ ތެރޭގައި ނިމޭނެ ކަމަށް ވަޒީރު އާދަމް ޝަރީފް އުމަރު ވިދާޅުވިއެވެ. ނަމަވެސް މަޑުއްވަރި ކައުންސިލް އިދާރާގެ މަސައްކަތް ފަށާނެ ދުވަހެއް ވިދާޅެއް ނުވެއެވެ.
ޗައިނާ ސަރުކާރުގެ އެހީގައި 50 ކައުންސިލް އިދާރާ އިމާރާތް ކުރުމުގެ މަސައްކަތްވެސް މިއަހަރު ފަށާނެކަން މިނިސްޓަރ ވަނީ އިއުލާނު ކުރައްވާފައެވެ. އެރަށްތައްވެސް ސަރުކާރުން ވަނީ އިއުލާނުކުރައްވާފައެވެ.
ރިއެކްޝަންސް
